तिलाचन पाण्डे
तम्घास, असार १६ गते । गुल्मीमा अलैँचीका १० हजार बिरुवा परीक्षणका लागि रोपिने भएको छ । कृषि ज्ञान केन्द्र गुल्मीले पहिलो पटक जिल्लामा परीक्षणका लागि अलैँची विकास केन्द्रबाट १० हजार बिरुवा ल्याई परीक्षणका लागि रोपण गर्न लागिएको कार्यालयका प्रमुख नवराज भण्डारीले जानकारी दिनुभयो ।
जिल्लामा अलैँची खेतीको सम्भावना भएपनि व्यवसायीक रूपमा खेती नभएकाले पहिलो पटक परीक्षणका लागि बिरुवा रोपण गर्न लागिएको उहाँको भनाइ छ । अलैँची विकास केन्द्र इलामबाट गुणस्तरीय बिरुवा ल्याएकाले परीक्षण सफल भएमा व्यवसायीक रूपमा नै खेती गर्ने गरी कार्यालयले योजना बनाउने भण्डारीले बताउनुभयो ।
मालिका गाउँपालिका-१ नेटाका जुजमान पुनले पाँच सय अलैँचीका बिरुवा कार्यालयबाट लिँदै छोराछोरीलाई जस्तै माया गरेर बिरुवा हुर्काउने बताउनुभयो। आफूले ओखर र कफीका बिरुवाहरू पनि लगाएको बताउँदै यसबाट राम्रो आम्दानी लिने गरी योजना बनाएको उहाँको भनाइ छ ।
यस्तै मालिका गाउँपालिका-७ घमिरका जगतबहादुर लम्सालले अलैँचीलाई कालो सुन भन्ने सुनेकाले कार्यालयमा बिरुवा माग गरेको बताउनुभयो । माग अनुसार बिरुवा पाएकाले कालो सुनलाई राम्रोसँग हुर्काएर व्यवसायीक बन्ने उहाँले बताउनुभयो ।
हाललाई मालिका र चन्द्रकोटलाई लक्षित गरी बिरुवा वितरण गरी रोपण गर्ने कृषि ज्ञान केन्द्र गुल्मीले जनाएको छ । यस खेतीका लागि चिस्यान भएको जमिन आवश्यक पर्ने कार्यालयले जनाएको छ।
