राजु लामिछाने
रुकुमपश्चिम, असार ६ गते । रुकुमपश्चिमको आठबिसकोट नगरपालिका-५ गोतामकोटबाट राडी बजारतर्फ आउँदै गरेको जिप दुर्घटना भएको छ । ग १ ज ७२५४ नम्बरको जिप बिहीबार बिहान जाजरकोटको नलगाड नगरपालिका-१० रग्दामा दुर्घटना भएको हो ।
घटनाका प्रत्यक्षदर्शी जमुना रोकाले दिनुभएको जानकारी अनुसार दुर्घटनामा परेर ६ जना घाइते भएका छन् । घाइतेहरुको उद्धार गरेर आठबिसकोट नगर अस्पताल पठाइएको रोकाले बताउनुभयो ।
नगर अस्पतालका निमित्त प्रमुख धनन्जय रिजालका अनुसार दुर्घटनाका ६ जना घाइतेहरुलाई अस्पताल ल्याइएको छ । उहाँका अनुसार घाइतेमध्ये दुई जनाको अवस्था गम्भीर छ ।
आठबिसकोट नगरपालिका-५ गोतामकोटका मोहन बुढा र जोगे महताराको अवस्था गम्भीर रहेको रिजालले जानकारी दिनुभयो । अन्य घाइतेको अवस्था सामान्य छ ।
