काठमाडौँ, वैशाख १३ गते । अख्तियार दुरुपयोग अनुसन्धान आयोगले कालिकोटको महावै गाउँपालिकाका तत्कालीन गाउँपालिकाका उपाध्यक्ष तथा अनुगमन समितिका संयोजक मनराज शाहीसहित नौ जनाविरुद्ध भ्रष्टाचार गरेको मुद्दा दायर भएको छ ।
कालीकोटको महावै गाउँपालिकास्थित सिमखेतदेखि ओदा जाने सडक निर्माणमा ३८ लाख ७६ हजार २७० रुपियाँ भ्रष्टाचार गरेको आरोपमा अख्तियारले बिहीबार विशेष अदालत काठमाडौँमा मुद्दा दायर गरेको हो ।
अख्तियारका प्रवक्ता नरहरि घिमिरेका अनुसार महावै गाउँपालिकाका तत्कालीन गाउँपालिका उपाध्यक्ष शाही, निमित्त प्रमुख प्रशासकीय अधिकृत गणेशमान सिंह, तत्कालीन इन्जिनियर रुद्रबहादुर वली, सब इन्जिनियर हरिप्रसाद पाण्डेय र सोही गाउँपालिका–२ का तत्कालीन वडाध्यक्ष गौकला सिंह र लेखापाल मलिम रावलविरुद्ध भ्रष्टाचार मुद्दा दायर भएको हो ।
यसैगरी, महावै गाउँपालिका सिमखेतदेखि पादमघाटसम्म सडक निर्माण उपभोक्ता समितिका अध्यक्ष अकल सुनार, कोषाध्यक्ष जर्मकला काफ्ले र सचिव ददी कामी भनिने दधि कामीविरुद्ध भ्रष्टाचार मुद्दा दायर भएको प्रवक्ता घिमिरेले जानकारी दिनुभयो ।
सिमखेतदेखि ओदा जाने सडक अन्दाजी २५ मिटर मात्र डोजरले खनी मान्छेले काम गरेको बिल बनाउन लगाएको एवम् वास्तविक कामभन्दा बढी परिमाणको काम भएको देखाई बढी रकम भुक्तानी लिएको भन्ने उजुरी परेपछि अख्तियारले छानबिन थालेको थियो ।
उजुरीका आधारमा अनुसन्धान हुँदा महावै गाउँपालिकाले आर्थिक वर्ष २०७५–२०७६ मा सिमखेतदेखि पादमघाटसम्म उपभोक्ता समितिमार्फत सडक निर्माण गराएको पाइएको अख्तियारको ठहर छ । सो कार्य सम्पन्न प्रतिवेदनमा सडकको लम्बाइ ८२० मिटर, चौडाइ ४ मिटर र कडा चट्टान काटिएको परिमाण २०४५ घनमिटर उल्लेख गरेको देखिएको छ ।
तर फिल्डमा सडकको वास्तविक लम्बाइ ५२० मिटर, चौडाइ औसत ३.७ मिटर र कडा चट्टान काटिएको परिमाण १६९.८० घनमिटर मात्र देखिएको अख्तियारको निष्कर्ष छ । यसरी गलत नापी किताब र कार्यसम्पन्न प्रतिवेदन तयार पारी नभएको कामको ३८ लाख ७६ हजार २७० रुपियाँ भुक्तानी गरी आफूहरूलाई गैरकानुनी लाभ र गाउँपालिकालाई हानि पुर्याई भ्रष्टाचार गरेको पुष्टि हुन आएको प्रवक्ता घिमिरेले जानकारी दिनुभयो ।
-original-thumb.jpg)
