१५ किलो बढी गाँजा सहित एक जना पक्राउ

सञ्जय कुमार मिश्र 

गौर, फागुन २९ गते । रौतहटको चन्द्रपुर १ नुनथरबाट प्रहरीले लागूऔषध गाँजा सहित एक जना पक्राउ परेका छन् । इलाका प्रहरी कार्यालय चन्द्रपुरबाट खटिएको प्रहरी टोलीले विशेष सूचनाको आधारमा सिन्धुलीबाट पौराईतर्फ आउँदै गरेका चन्द्रपुर नगरपालिका वडा नम्बर १ का ३७ वर्षीय साने भन्ने सन्त तामाङलाई १५ किलो ४ सय ग्राम गाँजा सहित पक्राउ गरेको हो ।

सिन्धुलीदेखि पौराईतर्फ आउँदै गरेको अवस्थामा गस्तीमा रहेका प्रहरीलाई शङ्का लागेर चेकजाँच गर्दा निजले बोकेको झोलाबाट प्रतिबन्धित लागूऔषध गाँजा बरामद भएपछि नियन्त्रणमा लिएर आवश्यक कारबाही प्रक्रिया अघि बढाइएको जिल्ला प्रहरी कार्यालय रौतहटका प्रहरी नायब उपरीक्षक एलिजा गिरीले बताउनुभयो ।

पक्राउ परेका तामाङ उपर लागूऔषध सम्बन्धी कसुर मुद्दा दर्ता गरेर अदालतबाट म्याद थप गरी आवश्यक अनुसन्धान भइरहेको प्रहरी नायब उपरीक्षक गिरीले बताउनुभयो ।