ड्यालस (टेक्सस), फागुन ५ गते । युलेस सिटी काउन्सिल सदस्यमा टीका पौडेल निर्विरोध चयन हुनुभएको छ । पौडेल दोस्रो कार्यकालका लागि चयन हुनुभएको हो ।
युलेस सिटीको प्लेस ६ का लागि पौडेलको मात्र उम्मेदवारी दर्ता भएको थियो । प्लेस ५ का लागि भने चार जनाको उम्मेदवारी परेको छ । तीन वर्ष अघि पौडेल निर्वाचित भएर आएपछि नेपाली समुदाय र अमेरिकी राजनीतिमा जोड्न पौडेलको सामाजिक कार्यप्रतिको भूमिका नेपाली समाजमा उच्च रहेको छ । नेपाली समुदायमा मात्र नभएर श्वेत अमेरिकन, अश्वेत अमेरिकी, आप्रवासीहरूका बिचमा पनि पौडेल निकै लोकप्रिय भएका छन् ।
युलेस सिटी ड्यालस फोर्टवर्थ मेट्रोप्लेक्समा पर्ने एउटा प्रमुख सहर हो । संसारकै पाँचौँ व्यस्त एयरपोर्ट ड्यालस फोर्टवर्थ अन्तर्राष्ट्रिय विमानस्थलसँग जोडिएको युलेस नेपालीहरूको रोजाइको सिटी हो । आउँदो नोभेम्बरमा राष्ट्रपति, सांसदको चुनाव हुने भए पनि सिटी काउन्सिल सदस्यको भने आउँदो मे महिना चुनाव हुँदै छ । सिटीका दुई काउन्सिल सदस्य हरेक वर्ष रिक्त हुँदै जाने नियम अनुसार यस वर्ष प्लेस ५ र ६ को निर्वाचन हुँदै छ ।
