काठमाडौँ, फागुन २ गते । भ्यालेन्टाइन डेको अवसर पारेर गायक उदित नारायण झा र दीपा झाको स्वरमा ‘थाहा छैन आज भोलि’ बोलको गीतको भिडियो सार्वजनिक भएको छ ।
गीतकार सरला श्रेष्ठको शब्द रहेको ‘थाहा छैन आज भोलि’मा लक्ष्मण पोखरेलको संगीत रहेको छ ।
मनोज चौलागाईंको एरेन्ज रहेको गीतमा मिक्सिङ मास्टरिङ किशोर थापाले गर्नुभएको छ । मंगलबार एक कार्यक्रमका बीच गीतकार समाजका अध्यक्ष बसन्त बित्यासी थापा, वरिष्ठ गीतकार बिबी थापा तथा वरिष्ठ संगीतकार राजु सिंहले सामूहिक रूपमा सार्वजनिक गरेको गीतको म्युजिक भिडियोमा गहिरो प्रेममा रहेको एक प्रेमील जोडीको रोमाञ्चक प्रेम कहानी देखाइएको छ ।
भिडियोले प्रेममा परेको मान्छे कति खुशी हुनसक्छ भनेर देखाउन खोजेको छ । जसमा मोडल भिजु पार्कीसँग नायिका श्रद्धा क्षेत्रीले अनस्किन रोमान्स गर्नुभएको छ ।
प्रेम दिवसको अवसर पारेर रिलिज गरिएको गीतको भिडियोको निर्देशन निर्देशक सुव्रत आचार्यले गर्नुभएको हो । उत्सव दाहालको छायाकंन रहेको भिडियोको सम्पादन विकास दाहालले गर्नुभएको हो । भिडियो एसएस क्रिएशन च्यानलबाट सार्वजनिक गरिएको छ ।
