सिराज खान
नेपालगन्ज, कात्तिक १४ गते । गोरखापत्रका नेपालगन्ज समाचारदाता सिराज खानलाई भारतको कानपुरमा आयोजना गरिएको एक अन्तर्राष्ट्रिय कार्यक्रममा सम्मानित गरिएको छ ।
इन्डियन जर्नलिस्ट एशोसिएसनको राष्ट्रिय समितिद्वारा भारत उत्तर प्रदेशको आर्थिक केन्द्र कानपुरमा सोमबार आयोजना गरिएको वर्तमान परिप्रेक्ष्यमा पत्रकारहरुको भूमिका विषयक अन्तर्राष्ट्रिय सम्मेलनमा सम्मान गरिएको हो ।
इन्डियन जर्नलिस्ट एशोसिएनका राष्ट्रिय अध्यक्ष सेराज अहमद कुरैशी, वरिष्ठ पत्रकारहरु जुबेर अहमद फारुकी, गिरिराज सिंह, डा. रमेश बर्मा, अन्जनि निगम लगायतले गोरखापत्रकर्मी खानलाई सम्मान गर्नुभयो ।
कार्यक्रमलाई सम्बोधन गर्ने अधिकांश वक्ताले लोकतन्त्रको रक्षाका लागि भारत र नेपालका पत्रकारको भूमिका सबैभन्दा अहम भएको जनाउँदै अहिले पनि सोही कार्यमा लागिरहेको बताएका थिए ।
कार्यक्रममा एशोसिएसनका राष्ट्रिय अध्यक्ष कुरैशिले एशोसियसनले यस्ता कार्यक्रमलाई निरन्तर गरिरहने बताउनुभयो ।सो अवसरमा भारतका दर्जनभन्दा बढी वरिष्ठ पत्रकारलाई विभिन्न सम्मान प्रदान गरिएको थियोे ।
सम्मेलनले पत्रकारहरुलाई सरकारले तलब सुविधा प्रदान गर्नुपर्ने र डिजिटल पत्रकारितालाई मान्यता दिनुपर्नेलगायत पत्रकारको सुरक्षा सम्बन्धी विभिन्न प्रस्ताव पनि पारित गरेको एशोसिएसनको कानपुर युनिटका अध्यक्ष मुकिम कुरैशीले बताउनुभयो । सो सम्मेलनमा भारत र नेपालका दुई सयभन्दा बढी पत्रकारको सहभागिता थियो ।
