काठमाडौँ, असार १ गते । आगामी भदौ ८ गतेदेखि प्रदर्शनको तयारीमा रहेको सिनेमा ‘जय हो’ को फर्स्टलुक पोस्टर सार्वजनिक गर्दै प्रचार प्रसारको सुरुवात गरिएको छ । निर्माण टिमले बिहीबार चलचित्रका दुई पोस्टर सार्वजनिक गर्दै प्रचार प्रसारको सुरु भएको जानकारी दिनुभएको छ । सार्वजनिक पोस्टरमा सिनेमाका मुख्य कलाकार सलोन बस्नेत, केकी अधिकारी, अर्पण थापा, निशा अधिकारी र माओत्से गुरुङलाई स्थान दिइएको छ । चलचित्रका सार्वजनिक दुई पोस्टरमध्ये पहिलो पोस्टरमा केही व्यक्तिहरू घोडामा आइरहेका छन्, भने उनीहरूलाई रोक्न मुख्य पात्रले तीर चलाइरहेको देख्न सकिन्छ ।
त्यस्तै अर्को पोस्टरमा अभिनेता माओत्से गुरुङ र निशा अधिकारी मुस्ताङको स्थानीय गुरुङ पहिरनमा छन् भने सलोन लामो कपाल र जुँगा फरक देखिएका छन् । अभिनेत्री केकी अधिकारी नाकमा बुलाकीसहित देखिँदा अभिनेता अर्पण थापालाई नाकबाट रगत बग्दै गरेको घाइते अवस्थामा देखिन्छन् । सिनेमाका सार्वजनिक दुई पोस्टरले दर्शकमाझ सिनेमाप्रति कौतूहल पैदा गर्ने देखिन्छ । सलोन सलिना फिल्मसको ब्यानरमा निर्माण भएको सिनेमाका प्रस्तुतकर्ता शोभित बस्नेत हुनुहुन्छ । राज के अधिकारी र सुरज सरकारको लगानी रहेको सिनेमालाई टेक पौरखी राईले निर्देशन गर्नुभएको हो ।
सौरभ लामाको डिओपी, शम्भुजित बास्कोटा र सागर आलेको सङ्गीत, बनिश शाहको सम्पादन, सम्राट् बस्नेतको द्वन्द्व निर्देशन, कविराज गहतराज र रामजी लामिछानेको कोरियोग्राफी, रेनिस फागोको कलर, समीर मियाँको भिएफएक्स, सुवास काफ्ले प्रोडक्सन हेड, केवलमान सिंह बस्नेत प्रोडक्सन म्यानेजर र समीर खान प्रोडक्सन डिजाइनर रहेको सिनेमाका मुख्य सहायक निर्देशक दिप्त प्रकाश अधिकारी हुनुहुन्छ ।
