काठमाडौं, जेठ २८ गते । युइएफए च्याम्पियन्स लिग फुटबलको उपाधि इङ्लिस क्लब म्यानचेस्टर सिटीले जितेको छ । टर्कीको इस्तानबुलस्थित एटाटर्क ओलम्पिया स्टेडियममा शनिबार राति भएको खेलमा सिटीले इटालियन क्लब इन्टर मिलानलाई १–० गोलले हरायो ।
सिटीलाई च्याम्पियन्स लिग उपाधि दिलाउन रोड्रीले निर्णायक गोल गर्नुभयो । प्रतिस्पर्धात्मक खेलमा रोड्रीले ६८औँ मिनेटमा रिवान्डका प्राप्त बलमा गोल गर्नुभएको थियो । सिटीले पहिलो पटक च्याम्पियन्स लिग फुटबल उपाधि जितेको हो ।
यससँगै सिटीले एकै सिजनका महत्त्वपूर्ण ‘ट्रेबल’ उपाधि जित्न सफल भएको छ । यसअघि सिटीले एफए कप र प्रिमियर लिग चुमेको थियो । सिटीले एफए कपको फाइनलमा म्यानचेस्टर युनाइटेडलाई हराएको थियो ।
सिटी ‘ट्रेबल’ उपाधि जित्ने दोस्रो इङ्लिस क्लब हो । यसअघि यस्तो उपलब्धि म्यानचेस्टर युनाइटेडले हात पारेको थियो । एजेन्सी
