चाँदनी आचार्य
घोडाघोडी (कैलाली) जेठ ६ गते । सामुदायिक विद्यालयमा भर्ना कार्यक्रम अन्तिममा पुगेको छ । कैलालीमा केही सामुदायिक विद्यालयमा विद्यार्थीको चाप बढेको छ । सामुदायिक विद्यालयको शैक्षिक गुणस्तर खस्कदै गइरहेको अवस्थामा केही विद्यालयमा भने विद्यार्थीको चाप बढ्दै जानुलाई शैक्षिक गुणस्तर राम्रो भएको अभिभावकहरु बताउछन् ।
कैलालीको घोडाघोडी नगरपालिका –१० पहलमानपुरमा रहेको कान्तिराज्य माध्यामिक विद्यालयमा कक्षा १२ सम्म पढाइ हुन्छ । त्यहा अहिले करिब १७ सय विद्यार्थी भर्ना भएका छन् ।
वि.सं. २०७८ मा प्रदेश सरकारको सिफारिसमा ठुला विद्यालय पूर्वाधार विकास कार्यक्रममा छनाेट भएको कान्ति माविमा विद्यार्थीको चापसँगै भौतिक पूर्वाधारको अभाव छ । विद्यालयका प्रधानाध्यापक उमाकान्त मिश्रले दुई समयमा कक्षा सञ्चालन गर्ने गरेको बताउनुभयो ।
उहाँले विद्यालयमा १८ वटामात्र कक्षा कोठा रहेकाले कक्षा १ देखि १० सम्मको दिउँसो, कक्षा ११ र १२ को बिहान सञ्चालन गरिँदै आएको जानकारी दिनुभयो । कक्षा नौमा तीनवटा समूह रहेको जानकारी दिनुहुँदै उहाँले एउटा कक्षामा ९० जनाभन्दा बढी विद्यार्थी राखेर पढाउनुपर्ने बाध्यता रहेको बताउनुभयो ।
नगरपालिकामा नतिजादेखि अतिरिक्त क्रियाकलापमा उत्कृष्ट विद्यालयको रुपमा रहेको कान्ति माध्यामिक विद्यालय विद्यार्थीको आकर्षण केन्द्र बन्दै गएको छ ।
ठुला विद्यालय कार्यक्रमको मान्यता अनुसार दुई हजार बढी विद्यार्थी हुनुपर्ने बाध्यता कान्ति माविलाई छ । त्यसैले आएकालाई फर्काउन पनि नसकिने, सिमित स्रोत साधनका बीच अध्ययापन गराउनुपर्ने बाध्यता रहेको प्रधानाध्यापक मिश्रको भनाइ छ ।
कैलालीको पूर्वीक्षेत्रका स्थानीयतहमा रहेका सरकारी विद्यालयमध्ये गौरीगङ्गा –४ मा रहेको कालिका माध्यामिक विद्यालय पनि शैक्षिक गुणस्तरमा नाम चलेको विद्यालयको रुपमा चिनिन्छ । हाल कक्षा १२ सम्म १३ सय विद्यार्थी भर्ना भएको यस विद्यालयमा माथिल्लो कक्षामा आवेदन फारममार्फत छनाेट गरिन्छ ।
कक्षा आठदेखि अंग्रेजी र नेपाली माध्यममा पढाइ हुने जानकारी दिनुहुँदै विद्यालयका प्रधानाध्यापक युवराज कँडेलले कक्षा नौ र १० मा विद्यार्थीको चाप अत्यधिक बढेकोे बताउनुभयो ।
पालिकामै उत्कृष्ट विद्यालयको रुपमा रहेको कालिका माविले केही वर्ष यता कक्षा आठ, १० र १२ मा टप गर्दै आएको प्रधानाध्यापक कँडेलको भनाइ छ ।
उहाँले कक्षा नौमा पाँच सेक्सन रहेको बताउनुभयो । उहाँले एक सेक्सनमा ५५ देखि ६० जना विद्यार्थी रहेको जानकारी दिनुभयो । विद्यालयले बस सुविधा दिएपछि विद्यार्थीको चाप झनै बढेको उहाँको भनाइ छ ।
भौतिक पूर्वाधारको र जनशक्तिको क्षमताका आधारमा भर्ना लिने गरेको प्रधानाध्यापक कंडेलले जनाउनुभयो । नगरपालिकाले नमुना विद्यालयको रुपमा विद्यालयलाई बस लगायत अन्य भौतिक पूर्वाधारमा सहयोग गर्ने गरेको नगरपालिकाले जनाएको छ ।
घोडाघोडी नगरपालिका शिक्षा शाखाका अधिकृत उमेश रेग्मीले घोडाघोडीमा नतिजा राम्रो दिने विद्यालयमा विद्यार्थीको चाप बढेको उल्लेख गर्नुभयो । उहाँले नगरपालिका भरि ५१ वटा सामुदायिक विद्यालय रहेको जानकारी दिनुहुँदै पाँच वटा विद्यालयमा विद्यार्थी भर्नाको चाप बढी रहेको उल्लेख गर्नुभयो ।
