पटकथा लेखन तथा निर्देशन कार्यशाला हुने

काठमाडौँ, चैत २ गते । चलचित्र विकास बोर्डको आयोजनामा चलचित्रको पटकथा लेखन तथा निर्देशन विषयमा केन्द्रित तीनदिने कार्यशाला हुने भएको छ ।

चैत ३ देखि ५ गतेसम्म हुने सो कार्यशालामा भारतीय फिल्ममेकर तथा पूर्वएफटीआईआई (फिल्म एन्ड टेलिभिजन इन्स्टिच्युट अफ इन्डिया, पुणे)का एसोसिएट प्रोफेसर अनुपम बर्वेको सहभागिता रहने बोर्डद्वारा जारी विज्ञप्तिमा उल्लेख छ । कार्यशालामा सहभागिता जनाउन बोर्डको वेबसाइट तथा सोसल प्रोफाइलमा रहेको फाराम भर्नुपर्ने हुन्छ भने यो कार्यशालामा सहभागी हुन शुल्क भने नलाग्ने जनाइएको छ । 

अनुपम बर्वे भारतीय निर्देशक र चलचित्र शिक्षक हुनुहुन्छ । उहाँ पछिल्लो समय एफटीआईआई (फिल्म एन्ड टेलिभिजन इन्स्टिच्युट अफ इन्डिया, पुणे)मा फिल्म निर्देशनको एसोसिएट प्रोफेसर रहनुभएको थियो ।