अमेरिकी अन्तरिक्ष केन्द्रले प्रोब डाइमर्फस नामको विशेष खालको अन्तरिक्ष यानलाई क्षुद्रग्रहमा योजनाबद्ध किसिमले ठोक्काएर पृथ्वीमा हुन सक्ने सम्भावित दुर्घटना टार्ने परीक्षण सफल भएको बताएको छ । सो क्रममा उक्त अन्तरिक्ष यान नष्ट भयो भने क्षुद्रग्रहले मार्ग परिवर्तन ग-यो ।
कुनै दिन पृथ्वीमा ठोक्किन सक्ने क्षुद्रग्रहलाई बेलैमा अर्कै मार्गमा धकेल्न सकिएला कि नसकिएला भनी अमेरिकाले सो परीक्षण गरेको थियो । नासाको प्लानेटरी साइन्सका निर्देशक डा. लोरी ग्लेजले उल्लेख्य परिणाम हासिल भएकोमा आफू ढुक्क भएको बताएकी छन् ।
“हामी मानव जातिको नयाँ युगतर्फ जाँदै छौँ, जुन युगमा सम्भवतः हामीसँग खतरनाक क्षुद्रग्रहको ठक्करबाट आफूलाई जोगाउन सामथ्र्य हुनेछ । यो
अद्भुत काम भयो । हामीसँग यसअघि कहिल्यै यस्तो क्षमता थिएन,” उनले भनिन् ।
ठक्कर दिनुअघि अन्तरिक्ष यानले सात सय ८० मिटर फराकिलो क्षुद्रग्रहलाई ११ घण्टा ५५ मिनेट लगाएर भेट्टाएको थियो । क्षुद्रग्रह पृथ्वीबाट एक करोड १० लाख किलोमिटर पर थियो ।
क्षुद्रग्रह भनेका सौर्यप्रणाली निर्माणका बेला बाँकी रहेका चट्टानी अवशेष हुन् । तीमध्ये अधिकांश पृथ्वीका लागि खतरा होइनन् तर कुनै बेला सूर्यको परिक्रमा गर्दा ती क्षुद्रग्रह र पृथ्वीको बाटो एउटै पर्दा क्षुद्रग्रह पृथ्वीसँग ठोकिन सक्छन् । तीन सय मिटरभन्दा ठूलो क्षुद्रग्रह ठोक्किँदा एउटा महादेशभरि र एक किलोमिटरभन्दा बढी आकारको क्षुद्रग्रह ठोक्किए विश्वभरि असर पर्ने अनुमान गरिएको छ ।
