सहदेव बस्नेत/वासुदेव शर्मा
जाजरकोट, मङ्सिर २६ गते । जाजरकोटमा जिप दुर्घटना हुँदा नौं जनाको घटनास्थलमै मृत्यु भएको छ । तीन जना घाइते भएका छन् । जिल्लाको छेडागाड नगरपालिका–४ र ५ को दशेरादेखि वडावन जाँदै गरेको अवस्थामा आज सोमबार साँझ ४ बजेर १० मिनेटमा भिरपाटी नजिक ०२-००१ च ४२९ नम्बरको बोलेरो जिप दुर्घटना भएको हो ।
जाजरकोटका प्रमुख जिल्ला अधिकारी अन्जनकुमार न्यौपानेले जिप दुर्घटनामा परेको खबरलगत्तै प्रहरी टोली घटनास्थलमा परिचालन गरिएको बताउनुभयो । हालसम्म नौ जनाको मृत्यु भएको र ३ जना घाइते भएको खबर आएको उहाँले जानकारी दिनुभयो ।
मृतक सबैको सनाखत
प्रहरी प्रमुख डिएसपी सन्तोषकुमार निरौलाले मृतक सबैको सनाखत भएको बताउनुभयो । उहाँका अनुसार दुर्घटनामापरी मृत्यु हुनेहरुमा छेडागाड नगरपालिका –५ का २८ वर्षीय दिपक अधिकारी, २६ वर्षीया नैनसरा अधिकारी, ३५ वर्षीय जयकुँरा वुढा, रामवहादुर बुढा, बीरवहादुर खत्री रहेका छन् ।
त्यस्तै छेडागाड –६ का बीरवहादुर खत्री, भगवतिमाइ गाउँपालिका –३ का अमरवहादुर खड्का, भगवतिमाइ गाउँपालीका –२ रुमा दैलेखका मानवहादुर रावत, र भगवतिमाइ गाउँपालिका –३ ढाडकुलाका बीरेन्द्र केसी रहनुभएको छ
यसैगरी दुर्घटनामा घाइते भएका अमरवहादुर अधिकारी, छेडा –५, का जैभान अधिकारी र निशा अधिकारी रहनुभएको छ । उहाँहरुको उपचारका लागि अस्पताल लैजाने तयारी भएको प्रहरीले जनाएको छ । घटनास्थलमा उद्धार टोली खटेकाले विस्तृत विवरण आउन केही समय लाग्ने उद्धारमा संलग्न प्रहरी सहायक निरीक्षक पदमराज भट्टले बताउनुभयो ।
