रवीन्द्र उप्रेती
रवीन्द्र उप्रेती
१२ जनाको मृत्यु, तीन सय बढी सवारीलाई कारबाही
बर्दिबास, कात्तिक ७ गते । चाडपर्वको समयमा महोत्तरीमा सवारी दुर्घटनामा वृद्धि भएको छ । दशैंमा जिल्लाका विभिन्न स्थानमा भएका मोटरसाइकल दुर्घटनामा १० जनाको मृत्यु भएको प्रहरीको तथ्याङ्क छ ।
यमपञ्चक सुरु हुने बेलातिर कात्तिकमा थप २ जनाको सवारी दुर्घटनामा मृत्यु भएको छ । बर्दिबासस्थित जिल्ला ट्राफिक कार्यालयका अनुसार दशैंताका जिल्लाभर ७७ दुर्घटना भएका थिए । यसमध्ये ग्रामीण भेगका भित्री सडकमा भएका दुर्घटनामा मानिसको मृत्यु भएको हो । दुर्घटनामा परि १२७ जना घाइते भएका छन् ।
सोनमा, पिपरा, मनरासिसवा, लोहरपट्टी, रामगोपालपुर, गौशालालगायतका ग्रामीण सडकमा बढी दुर्घटना हुने गरेको छ । बर्दिबासस्थित जिल्ला ट्राफिक प्रमुख उदयसिंह सिंजापतिका अनुसार ट्राफिक नियमको उल्लङ्घन गर्ने, हेलमेट नलगाउने, मादक पदार्थ सेवन गर्ने र तीव्र गति लगायत लापरबाहीका कारण दुर्घटना भएको हो । ट्राफिक प्रहरीको पहुँच र निगरानी नपुगेका ग्रामीण भेगका सडकमा दुर्घटना बढेको सिजापतिले बताउनुभयो ।
यसबिच चाडबाडलक्षित विशेष सुरक्षा योजना अन्तर्गत असोज महिनामा ट्राफिक नियम उल्लङ्घन गर्ने तीन हजार ३८५ सवारीमाथि कारबाही गरिएको छ । कारबाही पर्नेमा सबैभन्दा बढी एक हजार पाँच सय ट्याक्टर छन् । त्यस्तै कारबाहीको दायरामा पर्नेमा ८३५ ट्रक, ७१५ जीप कार, १२० मोटरसाइकल, ११४ बस, ६६ मोटरसाइकल र ६६ टेम्पो छन् । यी सवारीबाट २४ लाख ३९ हजार पाँच सय राजस्व सङ्कलन गरेको छ ।
