न्याउली खोलाको मोटरेबल पुल उदघाट्न

गुणबहादुर रोका 

सुलीकोट, जेठ ३ गते । उत्तरी गोरखाको आरुघाट–माछी खोला–लार्के सडकखण्ड अन्तर्गत धार्चे गाउँपालिका–७, न्याउली खोलामा निर्माण सम्पन्न मोटरेबल पुल उदघाटन गरिएको छ । 

गण्डकी प्रदेश भौतिक पूर्वाधार मन्त्रालयअन्तर्गत विनियोजित बजेटबाट पूर्वाधार विकास कार्यालय गोरखामार्फत उत्तरी गोरखा जोड्ने मुख्यस्थल न्याउली खोलामा पुलको धार्चे गाउँपालिकाका अध्यक्ष लक्ष्मण गुरुङले आइतबार बिहान ८ बजे एक कार्यक्रमबिच उदघाटन गर्नुभएको हो । 

उदघाटन कार्यक्रममा गाउँपालिकाका अध्यक्ष लक्ष्मण गुरुङले पुल निर्माणसँगै उत्तरी गोरखा पुग्ने स्थानीय तथा आन्तरिक तथा बाह्य पर्यटकलाई १२ महिना सवारी साधन आवत–जावतमा सहज हुनुका साथै उत्तरी गोरखाको आर्थिक तथा पर्यटन विकासमा टेवा पुग्ने विश्वास लिएको उहाँले बताउनुभयो ।

उत्तरी गोरखा पुग्ने जोह कोहीलाई पनि बर्खाको बेलामा खोला तर्न जोखिम मोलेर यात्रा गर्नुपर्ने बाध्यता थियो, अध्यक्ष लक्ष्मण गुरुङले भन्नुभयो, “गाउँपालिका र पूर्वाधार कार्यालय गोरखाले निर्माण कम्पनीलाई काम अघि बढाउन ताकेता गरेपछि निर्माण कम्पनीले समयमै काम सम्पन्न गरेको छ ।” 

पुल निर्माण सम्पन्न भएपछि १२ महिना सवारी साधन आवतजावतमा दूरी छोटिएर सहज हुनुका साथै उत्तरी गोरखावासीलाई चर्को भाडा तिरेर खाद्यान्न लगायतका सामानहरू ढुवानी गर्नुपर्ने अवस्था अन्त्य भएको धार्चे गाउँपालिकाका अध्यक्ष गुरुङले बताउनुभयो । 

न्याउली खोला पुल निर्माणका लागि २०७९ साल साउन २३ गते सूर्योदय कस्न्ट्रक्सन कम्पनी प्रालिसँग ४ करोड ३४ लाख ७५ हजार ३५९ रुपियाँ लागतामा ठेक्का सम्झौता भएको थियो । 

पुल निर्माण सम्पन्न भने २०८१ साउन २२ गते सम्पन्न गर्नुपर्ने सम्झौतामा उल्लेख भएता पनि निर्माण कम्पनीले विविध कारण देखाउँदै पुल निर्माणमा ढिलाइ गरेपछि कार्यालयले २०८३ साउन २२ गतेसम्म म्याद थपि दिएपछि निर्माण कम्पनीले ३ महिनाअघि नै निर्माण सम्पन्न गरेको पूर्बाधार कार्याल गोरखाका कार्यालय प्रमुख सन्तोष अर्यालले बताउनुभयो  

न्याउली खोलामा मोटरेबल पुल निर्माण सम्पन्न भएपछि उत्तरी गोरखावासी र आन्तरिक तथा बाह्य पर्यटकलाई सहज यात्रा र पुल निर्माणले व्यापार व्यवसायमा वृद्धि हुनुका साथै आयआर्जनमा टेवा पुग्ने विश्वास छ ।