वालिङ (स्याङ्जा), फागुन १४ गते । यहाँको भीरकोट नगरपालिकाले आँधी खोला किनार क्षेत्रमा परीक्षणका रूपमा तर्बुजा खेती सुरु गरेको छ ।
हेफर इन्टरनेसनलसँगको सहकार्यमा भीरकोट कृषि तथा पशु विकास परियोजनामार्फत तर्बुजा खेतीको सम्भाव्यता अध्ययन गरी व्यावसायिक तर्बुजा खेती गर्ने लक्ष्य लिएको नगर प्रमुख गोविन्दकुमार कर्माचार्यले बताउनुभयो । यहाँको हावापानी, माटो तर्बुजा खेतीका लागि उपयुक्त हुने देखिएकाले व्यावसायिक रूपमा अगाडि बढाउन पहिलो चरणमा बिउ, बेर्ना, उपकरण तथा प्राविधिक सहयोग गरिएको उहाँले बताउनुभयो ।
“सम्भवतः जिल्लामै पहिलो पटक तर्बुजाखेती सुरु गरिएको छ” उहाँले भन्नुभयो, “पहिलो चरणमा यहाँका किसानले परीक्षणका रूपमा लगाएका छन् । यो राम्रो हुनासाथ ठुलो परिमाणमा व्यावसायिक उत्पादनमा जोड दिन्छौँ ।”
यहाँ उत्पादित तर्बुजा किसान आफैँले बिक्री गर्नसक्ने र यदि नसकेमा नगरपालिकाले जिम्मा लिने उहाँले बताउनुभयो । भीरकोट नगरपालिका–१, आँधी खोला नदी किनारको भीरकोट खेलमैदान परिसर, वडा नं ४, वडा नं ५ को पकान, वडा नं ६ को एकुवार फाँटको २० रोपनी क्षेत्रफलमा पहिलो पटक तर्बुजा खेती सुरु गरिएको हो । यसपटक १८ किसानले तर्बुजा रोपेका छन् ।
यहाँ रोपिएको तर्बुजा आगामी जेठ मसान्तसम्ममा उत्पादन लिन सकिने परियोजनाका कृषि प्राविधिक अनिश अर्यालले जानकारी दिनुभयो । जिल्लामै पहिलो, नयाँ र नमूना खेती भएकाले यहाँका किसान यस खेती प्रविधि बुझेर व्यावसायिक उत्पादनमा लाग्न सक्ने उहाँले बताउनुभयो ।
लक्ष्मी र सरस्वती दुई जातका तर्बुजा नमुना परियोजनाका रूपमा रोपिएका छन् । नगरपालिकाले तर्बुजाका साथै सिम्ला मिर्च, अकबरे खुर्सानीसहित बेमौसमी तरकारी उत्पादनमा जोड दिएको छ । रासस
-original-thumb.jpg)
