अडानीमाथि अमेरिकी जाँच

मुम्बई, माघ २७ गते । भारतको अडानी इन्टरप्राइजेजले इरानी तेलजन्य उत्पादन आयात गरेको आरोप सम्बन्धी मिडिया रिपोर्ट सार्वजनिक भएपछि सम्भावित अमेरिकी प्रतिबन्ध उल्लङ्घनको अनुसन्धानमा सहयोग गरिरहेको खुलासा मङ्गलबार गरेको छ ।

कम्पनीका अनुसार उक्त विषयमा अमेरिकी अधिकारीले चासो देखाएपछि आवश्यक विवरण उपलब्ध गराउँदै सहकार्य भइरहेको छ । वाल स्ट्रिट जर्नलले गत जुनमा अमेरिकी अभियोजकले अडानी समूह अन्तर्गतका संस्थाले इरानी मूलका तेल उत्पादन आयात गरेका थिए वा थिएनन् भन्ने विषयमा अनुसन्धान गरिरहेको रिपोर्ट प्रकाशित गरेको थियो ।

उक्त रिपोर्टमा मुन्द्रा बन्दर गाहबाट तरलीकृत पेट्रोलियम ग्यास (एलपिजी) को उत्पत्ति, त्यसको ढुवानीमा प्रयोग गरिएका ट्याङ्कर र इन्धन ढुवानीका विभिन्न विवरणबारे अमेरिकी अधिकारीले निगरानी गरिरहेको उल्लेख गरिएको थियो । अडानी इन्टरप्राइजेजले मङ्गलबार स्टक एक्सचेन्जमा दायर गरेको विवरणमा अमेरिकी अर्थ मन्त्रालयअन्तर्गत प्रतिबन्ध कार्यान्वयन हेर्ने निकाय युनाइटेड स्टेट्स अफिस अफ फरेन एसेट्स कन्ट्रोल (ओएफएसी) बाट गत हप्ता ‘जानकारीका लागि अनुरोध’ प्राप्त भएको बताएको छ ।

कम्पनीले उक्त अनुरोध गत वर्षको मिडिया रिपोर्टपछि स्वेच्छिक रूपमा ओएफएसीसँग सम्पर्कमा गएपछि मात्र आएको स्पष्ट गरेको छ । अडानी समूह अर्बपति व्यवसायी गौतम अडानीद्वारा सञ्चालित विशाल पोर्ट–टु–पावर समूह हो । वाल स्ट्रिट जर्नलको रिपोर्ट जुन २ मा प्रकाशित भएको दिन नै ‘पर्याप्त सावधानी अपनाउँदै र सहकार्यको प्रयास स्वरूप कम्पनीले सबै एलपिजी आयात बन्द गरेको’ विवरण फाइलिङमा उल्लेख गरिएको छ ।

फाइलिङ अनुसार ओएफएसीले कम्पनीलाई अमेरिकी वित्तीय संस्थामार्फत गरिएका केही लेनदेनको नागरिक जाँच भइरहेको जानकारी गराएको छ । ती लेनदेन ‘प्रत्यक्ष वा अप्रत्यक्ष रूपमा इरान वा इरानमाथि अमेरिकी प्रतिबन्ध लागेका व्यक्तिको हितमा संलग्न हुनसक्ने’ आशङ्काका आधारमा हेरिएको बताइएको छ ।

अडानी इन्टरप्राइजेजले ओएफएसीले ठ्याक्कै के विवरण मागेको हो भन्ने कुरा सार्वजनिक गरेको छैन । तर निकायसँगको संवादमा ‘कुनै पनि विचलन वा गैर–अनुपालनको निष्कर्ष समावेश नभएको’ स्पष्ट गरेको छ । कम्पनीले ‘ओएफएसीसँग पूर्ण रूपमा सहयोग गरिरहेको र माग गरिएको सम्पूर्ण जानकारी उपलब्ध गराइने’ बताएको छ । 

यसअघि अडानी समूहले ‘इरानी मूलको एलपिजी सम्बन्धी कुनै पनि प्रकारको प्रतिबन्ध छल्ने वा अवैध व्यापारमा जानाजानी संलग्नता’ अस्वीकार गर्दै आएको छ । मिडिया रिपोर्टमा उल्लेख गरिएको ढुवानी ‘तेस्रो पक्षका रसद साझेदारमार्फत नियमित व्यावसायिक लेनदेनका रूपमा गरिएको’ र सोहर, ओमानलाई मूल बन्दरगाह देखाउने कागजातद्वारा समर्थित रहेको अडानी समूहले जनाएको छ । रासस/एएफपी