देशलाई बदल्ने र बनाउने शक्ति कांग्रेससँग मात्रै छ : उपसभापति शर्मा

सिराज खान 

नेपालगन्ज, माघ २७ गते । नेपाली कांग्रेसका केन्द्रीय उपसभापति विश्वप्रकाश शर्माले देशलाई बदल्ने र बनाउने शक्ति एवं चाहना नेपाली कांग्रेससँग मात्रै रहेको दाबी गर्नुभएको छ ।

नेपाली कांग्रेस बाँकेले मङ्गलबार नेपालगन्जमा आयोजना गरेको बृहत् जिल्ला भेलालाई सम्बोधन गर्दै उपसभापति शर्माले देशको सबैभन्दा पुरानो पार्टी अहिलेको माग र अवस्थालाई ध्यानमा राखेर सबैभन्दा नयाँ बनेर आएको बताउनुभयो ।

उहाँले भन्नुभयो, “नेपालका लागि कांग्रेस नै सबैभन्दा जिम्मेवार र जनताप्रति उत्तरदायी पार्टी हो । जब जब देशलाई बलिदान र त्याग आवश्यक पर्‍यो, त्यति बेला यही पार्टीले देशको नेतृत्व गरेको इतिहास साक्षी छ ।”

नेपाली कांग्रेसको केन्द्रीय निर्वाचन परिचालन समितिका संयोजक समेत रहनुभएका शर्माले वर्तमान अवस्थालाई ध्यानमा राखेर जनताको माग र चाहना अनुसार कांग्रेसले दुई तिहाइ युवालाई उम्मेदवार बनाएको स्पष्ट पार्नुभयो । उहाँले यस पटक महिला र पिछडिएका समुदायलाई पनि विगतभन्दा दोब्बर सङ्ख्यामा टिकट दिएको बताउनुभयो ।

धेरै पटक कांग्रेसले आफू पराजित भएर पनि देश र जनतालाई जिताएको स्मरण गर्दै उहाँले संविधानको रक्षा र देशको प्रगति एवं उन्नतिका लागि कांग्रेसको विकल्प नरहेको उल्लेख गर्नुभयो । संविधानका पिता स्वर्गीय सुशील कोइरालाको जिल्लामा कांग्रेसलाई झनै बलियो बनाएर देशभरि देखाउने अभिभारा यहाँका नेता–कार्यकर्ताको काँधमा आएको उहाँको भनाइ थियो । विशेष महाधिवेशनपछि नेपाली कांग्रेसमा नयाँ ऊर्जा र शक्ति उत्पन्न भएको दाबी उहाँले गर्नुभयो ।

नेपाली कांग्रेस बाँकेका उपसभापति गोपाल अधिकारीको अध्यक्षतामा सम्पन्न भेलामा पार्टीका केन्द्रीय सदस्य गोपाल दहित, बाँके क्षेत्र नं. १, २ र ३ का उम्मेदवार क्रमशः नारायण गौडेल, सुधांशु कोइराला र अमरसिंह पुन लगायतले नेपाली कांग्रेसलाई विजयी गराउन अनुरोध गर्नुभयो । सो अवसरमा बाँकेका तीनवटै क्षेत्रका नेता–कार्यकर्ता र सर्वसाधारणको उल्लेख्य उपस्थिति थियो ।