अमरराज नहर्की
तनहुँ, पुस २३ गते । तनहुँको ऋषिङ गाउँपालिका–१ झापुटारस्थित तनहुँ जलविद्युत आयोजनाको निर्माणाधीन ड्याम साइडमा मेसिनले च्यापिँदा एक कामदारको मृत्यु भएको छ भने पृथ्वी राजमार्गको ठुलोढुङ्गामा भएको अर्को दुर्घटनामा एक पैदल यात्री गम्भीर घाइते भएका छन् ।
जलविद्युत आयोजनाको निर्माणस्थलमा कालिका कन्स्ट्रक्सनमार्फत कार्यरत व्यास नगरपालिका–५ निवासी २५ वर्षीय महेन्द्र थापाको मृत्यु भएको हो । गिट्टी सम्याउने काम गरिरहेको अवस्थामा अचानक एक्साभेटर ब्याक हुँदा एक्साभेटर र टिपरको बीचमा च्यापिएर गम्भीर घाइते भएका थापालाई तत्काल उपचारका लागि रत्नहरी अस्पताल दमौली लगिएकोमा चिकित्सकले मृत घोषणा गरेका थिए ।
जिल्ला प्रहरी कार्यालय तनहुँका सूचना अधिकारी तथा प्रहरी नायव उपरीक्षक श्रवणकुमार बिकका अनुसार घटनामा संलग्न बा।प्र।०६–००१ क ०२५१ नम्बरको टिपर, इ एक्स ०६६ नम्बरको एक्साभेटर तथा टिपर चालक चितवनका ३३ वर्षीय जीवन कुमार गोले र एक्साभेटर चालक बर्दियाका २२ वर्षीय विशाल थारुलाई नियन्त्रणमा लिइएको छ ।
प्रनाउ बिकले घटनाको पुष्टि गर्दै भन्नुभयो, “तनहुँ जलविद्युत आयोजनामा कार्यरत मजदुरको काम गर्ने क्रममा मेसिनले च्यापिएर मृत्यु भएको हो, हामीले सवारी साधन र चालक दुवैलाई नियन्त्रणमा लिएर घटनाबारे थप अनुसन्धान गरिरहेका छौँ।’’ मृतकको शव हाल दमौलीस्थित प्रदेश अस्पतालको शवगृहमा राखिएको छ ।
त्यसैगरी, सोही साँझ करिब ६ः२० बजे बन्दिपुर गाउँपालिका–४ ठुलोढुङ्गास्थित पृथ्वी राजमार्गमा सवारी साधनले ठक्कर दिँदा पैदल यात्री ५५ वर्षीय कुलदेव शाह गम्भीर घाइते भएका छन् । भारत घर भई हाल सानो डुम्रे बस्दै आएका शाहलाई ठक्कर दिने सवारी साधनको खोजी गर्ने क्रममा प्रहरीले राति ८ः३० बजे ग १६ प १६५३ नम्बरको मोटरसाइकल र चालक सोम बहादुर आलेलाई नियन्त्रणमा लिएको छ ।
टाउकोमा गम्भीर चोट लागेका शाहलाई डुम्रेमा सामान्य उपचारपछि थप उपचारका लागि चितवन मेडिकल कलेजमा रिफर गरिएको र उहाँको अवस्था गम्भीर रहेको प्रहरीले जनाएको छ ।
