नवलपुर समाचारदाता
नवलपुर, पुस २३ गते । नवलपुरको कावासोती नगरपालिकामा निर्माण भइरहेको केरुङ्गे खोलाको पुल आठ वर्षको अवधिमा पनि निर्माण सम्पन्न हुन सकेको छैन । नगरपालिकाका वडा नम्बर ३, ४ र ५ लाई जोड्ने पुलको आठ वर्षमा ९० प्रतिशत काम सम्पन्न भएको छ ।
तीन वर्षमा सक्ने गरी २०७५ सालमा सुरु भएको पुल निर्माणको काम अहिले ९० प्रतिशत सकिएको कावासोती नगरपालिका–४ का वडाध्यक्ष नारायणप्रसाद लोहनीले बताउनुभयो । २०७७ साल असारसम्ममा निर्माण सम्पन्न गर्नुपर्नेमा सम्झौता भए पनि निर्माणको काम अलपत्र पारेर पटक पटक ठेकेदार सम्पर्कविहीन भएपछि निर्धारित समयमा पुल सम्पन्न हुन नसकेको हो । पुलको माथिल्लो भाग कालोपत्रे भएर आवतजावत गर्न मिल्ने भए पनि पुललाई जोड्ने दायाँबायाँ बाटो कालोपत्रे भएको छैन भने तटबन्ध निर्माण र ग्याबिन पर्खाल लगाउने काम पनि बाँकी छ ।
तटबन्ध निर्माण नहुँदा तटीय क्षेत्रमा डुबानको जोखिम रहेको भन्दै वडाध्यक्ष लोहनीले तत्काल निर्माणको काम थालनी गर्न ठेकेदार कम्पनीलाई आग्रह गर्नुभयो । यहाँ पुल निर्माण नहुँदा बर्खाको समयमा विद्यार्थी, हुप्सेकोट र कावासोतीका व्यावसायिक किसानलाई सबैभन्दा बढी समस्या हुने गरेको छ ।
