बेइरूत, पुस १९ गते । इजरायली सेनाले दक्षिण लेबननमा शान्ति सैनिकको नजिक दुई पटक गोली चलाएको भन्ने कुरा संयुक्त राष्ट्र अन्तरिम फोर्स इन लेबनन (युनिफिल)ले शुक्रबार जनाएको छ ।
यस्ता घटना ‘चिन्ताजनक प्रवृत्ति’ को रूपमा लिइएको छ । सैनिकले बिहान कफर शौबा नजिक पहिलो पटक करिब १५ राउन्ड साना हतियारको गोली करिब ५० मिटरको दूरीमा चलाएको थियो । त्यसको २० मिनेटभित्रै दोस्रो टोलीले करिब १०० राउन्ड मेसिन-गनको गोली उस्तै दूरीमा चलाएको छ । यी घटनामा कोही घाइते नभएको र कुनै क्षति पनि नभएको बताइएको छ ।
गोली इजरायली सेनाबाट आएको युनिफिलले अनुमान गरेका छन् । यसपछि संयुक्त राष्ट्र फोर्सले तुरुन्तै गोली रोक्न अनुरोध पत्र पठाएको थियो । शान्ति सैनिकको गतिविधि पहिले नै इजरायली सेनालाई जानकारी दिइएको थियो ।
संयुक्त राष्ट्र फोर्सले भनेको छ, “यस्ता घटना धेरै नियमित रूपमा भइरहेका छन् र चिन्ताजनक प्रवृत्ति बन्दै गएको छ । शान्ति सैनिक नजिक गोली चलाउनु संयुक्त राष्ट्र सुरक्षा परिषदको सङ्कल्प १७०१ को स्पष्ट उल्लङ्घन हो ।” इजरायली सेनाले अहिलेसम्म यस घटनामा कुनै प्रतिक्रिया दिएको छैन । पहिलेका झडपमा पनि शान्ति सैनिकका ठाँउ लक्षित भएका थिए, जसमा चोट पटक र क्षति पुगेको बताइएको छ । रासस/सिन्ह्वा
