काठमाडौँ, पुस १६ गते । नेपाली फुटबलको सर्वोच्च संस्था अखिल नेपाल फुटबल सङ्घ (एन्फा) को निर्वाचन आगामी माघ २८ गते हुने भएको छ ।
एन्फा कार्यसमितिको बुधबार बसेको बैठकले निर्वाचनको मिति तय गरेको हो । चार वर्षमा हुने एन्फाको निर्वाचन ६ महिलाअघिनै हुन लागेको हो ।
पंकजविक्रम नेम्वाङको अध्यक्षतामा बसेको कार्यसमितिको बहुमत सदस्यले केही समय अगावै (अर्ली इलेक्सन) मा जाने निर्णय गरेको हो । यसअघि २०७९ असार ६ गते नेम्वाङ नेतृत्वको कमिटि एन्फामा निर्वाचित भएको थियो ।
बैठकमा एन्फा कार्यसमितिकै केही पदाधिकारीले जिल्ला र प्रदेशको चुनाव नभएको अवस्थामा चार वर्षे कार्यकाल सकिएपछि मात्र निर्वाचन गरिनु पर्ने प्रस्ताव राखेका थिए ।
तर, एन्फाले अमेरिका, क्यानडा र मेक्सिकोमा आयोजना हुने आसन्न फिफा विश्वकपलाई लक्षित गरी अर्ली इलेक्सन गर्ने निर्णय गरेको हो ।
