साहारा लिम्बू
फुङलिङ, पुस ११ गते । पाथीभरा मन्दिरमा सङ्कलन भएको सुन तथा चाँदीको फेरी लिलामका लागि सिलबन्दी बोलपत्र आह्वान गरिएको छ । पाथीभरा क्षेत्र विकास समितिले सुन तथा चाँदीको लिलामका लागि सिलबन्दी बोलपत्र आह्वान गरेको हो ।
बुधबारबाट २१ दिने सूचना जारी गर्दै एक सय ७८ तोला ८२ लाल सुन बिक्री गर्न लागि सिलबन्दी बोलपत्र आह्वान गरिएको पाथीभरा क्षेत्र विकास समितिका कार्यकारी निर्देशक प्रजिन हाङ्बाङले जानकारी दिनुभयो । उहाँका अनुसार न्यूनतम प्रतितोला दुई लाख ६७ हजार दुई सय रुपियाँ लिलामी मूल्य तोकिएको छ ।
यस्तै, पाँच हजार दुई सय ९८ तोला १२ लाल चाँदी पनि बिक्री गरिने भएको छ । चाँदीको मूल्य भने न्यूनतम प्रतितोला चार हजार दुई सय ५५ रुपियाँ तोकिएको हाङ्बाङको भनाइ छ । यस अघि पनि क्षेत्र विकास समितिले पटकपटक सुन तथा चाँदीको लिलामका लागि सूचना जारी गरेको थियो ।
तर अहिलेसम्म उक्त सुन चाँदी बिक्री हुन सकेको छैन । पाथीभरा मन्दिरमा भक्तजनले चढाएको सुन तथा चाँदी समितिले सङ्कलन गरी फुङ्लिङमा ल्याएर सरसफाइ गरी रिफाइन गर्ने गरेको छ ।
उक्त सुन तथा चाँदी खरिद गर्न इच्छुकले आगामी पुस २९ गतेसम्म सिलबन्दी बोलपत्र पेश गर्न सक्नेछन् ।
-original-thumb.jpg)
