काठमाडौं, असार २५ गते । गोरखापत्र संस्थान अन्तर्गत सूचना प्रविधि विभागमा कार्यरत चिरञ्जीवी रेग्मीको उपचारको क्रममा शुक्रबार राति ९ बजे निधन भएको छ । सामान्य अवस्थामा कलङ्कीस्थित शहीद मेमोरियल अस्पताल भर्ना हुनुभएका उहाँको उपचारकाे क्रममा असामयिक निधन भएको थियो ।
सात वर्षदेखि कम्प्युटर शाखामा कम्प्युटर सहायक पदमा स्थायी सेवामा कार्यरत रेग्मीको पार्थिव शरीर शुक्रबार राति गृह जिल्ला गोरखाको गण्डकी गाउँपालिका घ्याल्चोक लगिएको परिवार स्रोतले जानकारी दिएको छ ।
वि.सं. २०७३ साल माघ महिनादेखि सेवा प्रवेश गर्नुभएका उहाँप्रति गोरखापत्र संस्थान परिवारले हार्दिक श्रद्धाञ्जलि अर्पण गरेको छ भने शोकसन्तप्त परिवारप्रति समवेदना प्रकट गरेको छ । रेग्मीको परिवारमा श्रीमतीसहित एक छोरी र एक छोरा हुनुहुन्छ ।
