भवानीदत्त भट्ट
कञ्चनपुर, मङ्सिर २२ गते । कञ्चनपुरको बेलौरीमा आयोजित ‘वडा स्तरीय मेयर फुटबल’ प्रतियोगितामा एक खेलाडीमाथि निर्घात कुटपिट गर्ने जना विरुद्ध प्रहरीमा किटानी जाहेरी परेको छ । गत बिहीबार चलेको पहिलो सेमिफाइनल खेलकाबिच सामान्य विवादका क्रममा वडा १० का खेलाडी करन पालमाथि वडा १ का खेलाडी र समर्थकहरूले सांघातिकरुपमा निर्घात कुटपिट गरेका थिए ।
कुटपिटबाट घाइते पालको धनगढीस्थित माया मेट्रो अस्पतालमा उपचार भइरहेको छ । पालको नाँकका ४ हड्डीसमेत टुटेको उपचारमा संलग्न चिकित्सकहरूले बताएका छन् । पालको नाक, आँखा, टाउको र शरीरमा चोट रहेको बताइएको छ ।
कुटपिटमा संलग्न ४ जनामाथि घाइते पालका परिवारले दिएको किटानी जाहेरीका आधारमा उनीहरूको खोजी कार्य भइरहेको इलाका प्रहरी कार्यालय बेलौरीले जनाएको छ । इलाका प्रहरी कार्यालय बेलौरीका प्रमुख प्रहरी निरीक्षक कमल चौधरीले फुटबल खेलाडी पालमाथि कुटपिटमा संलग्न वडा १ का चार जनाको खोजी कार्य भइरहेको बताउनुभयो । गत बिहीबार एक्कासि खेलाडीमाथि सांघातिकरुपमा कुटपिट भएपछि स्थिति नियन्त्रणमा लिन नसकिएको प्रहरी निरीक्षक चौधरीले बताउनुभयो । तथापि घटना झन् हिंसात्मक हुन नदिन प्रहरीले प्रयास भने गरेको उहाँले बताउनुभयो ।
वडा नम्बर १० खेलकुद विकास समितिका अध्यक्ष तीर्थराज उपाध्यायले पालमाथि कुटपिट गर्ने वडा नम्बर १ का सन्तोष शाही, महेन्द्र शाही सहितका चार जनामाथि किटानी जाहेरी दिएको बताउनुभयो । उहाँका अनुसार कुटपिटमा अन्यको संलग्नता रहेपनि पहिचान भएका विरुद्ध किटानी जाहेरी दर्ता गरिएको छ । खेलका क्रममा साङ्घातिक आक्रमण गर्ने विरुद्ध उहाँले हदै सम्मको कारबाहीको माग गर्नुभयो । साथै बेलौरी खेलकुद नगर विकास समितिले घाइतेको उपचार खर्च र घटनाको सम्पूर्ण जिम्मेवारी लिनुपर्ने वडा नम्बर १० खेलकुद विकास समितिले माग समेत गरेको छ ।
मङ्सिर १५ गतेदेखि २० गतेसम्म बेलौरीको खुला मञ्चमा वडा स्तरीय खेल खेलाएर नगरको टिम छनौटका लागि आयाजित खेलको सेमिफाइनल प्रतियोगितामा खेलाडीमाथि कुटपिट गरिएपछि प्रतियोगिता प्रभावित बनेको छ ।
समूह ‘ए’ अन्तर्गत वडा नम्बर १ र १० तथा समूह ‘बि’ अन्तर्गत वडा नम्बर ९ र ४ का खेलाडीहरू फाइनल खेलका लागी प्रतिस्पर्धामा थिए । तर घटनापछि खेल पूर्णरुपमा स्थगित गरिएको बेलौरी नगर खेलकुद विकास समितिका अध्यक्ष रामेश्वर न्यौपानेले बताउनुभयो । फुटबल खेलाडी पालमाथि कुटपिट गर्नेमाथि प्रहरीमा कारबाहीको माग गरिएको बताउँदै उहाँले उपचारमा आवश्यक पर्ने खर्च जोहो गर्ने कार्य भइरहेको बताउनुभयो । घाइतेको उपचार पछि खेल पुनः सञ्चालन गर्ने विषयमा छलफल गरिने उहाँले बताउनुभयो ।
