• १४ मंसिर २०८२, आइतबार

तेस्रो मेयर कपः बागलुङ नगरपालिकाको विजयी सुरुवात

blog

तेस्रो मेयर कप फुटबल प्रतियोगिताको उद्घाटन खेलमा प्रतिस्पर्धा गर्दै बागलुङ नगरपालिका (निलो) र जलजला गाउँपालिका पर्वतका खेलाडी । तस्बिरः अर्जुन कार्की

अर्जुन कार्की

काठेखोला (बागलुङ), मङ्सिर १४ गते । आयोजक बागलुङ नगरपालिका (निलो) ले तेस्रो संस्करणको मेयर कप फुटबल प्रतियोगितामा विजयी सुरुवात गरेको छ । 

बागलुङ नगरपालिका–१, बाङ्गेचौर खेलमैदानमा आइतबार भएको उदघाटन खेलमा छिमेकी जिल्ला पर्वतको जलजला गाउँपालिकालाई ५–० ले पराजित गर्दै बागलुङ सेमिफाइनलमा प्रवेश गरेको हो ।

खेलको छैठौं मिनेटमा बागलुङका दिप्लभ जिसीले गोल गर्दै आयोजक टिमलाई अग्रता दिलाउनुभएको थियो । डिबक्स भित्रबाट राजिव श्रीसले दिएको उत्कृष्ट पासलाई जिसीले गोलमा परिणत गर्नुभयो । खेलको ३८ औं मिनेटमा पेनाल्टी बक्सबाट बरदान थापाले गोल गर्दै बागलुङलाई पहिलो हाफमा २–० को अग्रता दिलाउनुभयो । 

बागलुङ नगरपालिकाका लागि खेलको ४९ औं मिनेटमा सुशिल मगर र ५८ औं मिनेटमा सौरभ गौतमले गोल गरेभने ७३ औं मिनेटमा आयुष पौडेलले गोल गर्नुभएको थियो ।

खेलको अधिकांश समय बागलुङले विपक्षी जलजलामाथि दबाब कायम गरेको थियो । खेलको प्लेयर अफ द म्याच विजेता टिमका कप्तान निशान थापा घोषित हुनुभयो । उहाँले नगद २ हजारसहित ट्रफी प्राप्त गर्नुभयो ।

प्रतियोगिताको उद्घाटन बागलुङ नगरपालिकाका नगर प्रमुख वसन्तकुमार श्रेष्ठले गर्नुभएको थियो । उद्घाटन समारोहमा बोल्दै नगर प्रमुख श्रेष्ठले स्थानीयस्तरबाट क्षमतावान् खेल प्रतिभाहरूको पहिचानसहित उचित अवसर समेत प्रदान गर्ने उद्देश्यका साथ प्रतियोगिता आयोजना गरिएको बताउनुभयो । 

प्रतियोगिता अन्तर्गत सोमबार तीन खेल हुने प्रतियोगिताका संयोजक सुदिप गौतमले बताउनुभयो । सोमबारको पहिलो खेल जैमिनी नगरपालिका बागलुङविरुद्ध बेनी नगरपालिका म्याग्दी, दोस्रो खेल गलकोट नगरपालिका बागलुङविरुद्ध गण्डकी प्रदेश प्रहरी पोखरा र तेस्रो खेल कालीजङ्ग गण घोडाबाधेविरुद्ध पैयुँ गाउँपालिका पर्वतका बिच हुने छ ।

बागलुङ नगरपालिका नगर खेलकुद विकास समितिको आयोजनामा जारी प्रतियोगिताको फाइनल खेल १८ गते हुने छ । प्रतियोगिताको विजेता टिमले ३ लाख ३३ हजार ३ सय ३३ रुपियाँ र उपविजेताले २ लाख २२ हजार २ सय २२ रुपियाँ प्राप्त गर्ने छन् । यस्तै विधागततर्फ सर्वोत्कृष्ट खेलाडी, सर्वाधिक गोलकर्ता, सर्वोत्कृष्ट गोलरक्षक र सर्वोत्कृष्ट प्रशिक्षकले १०–१० हजार रुपियाँ प्राप्त गर्ने छन भने प्रत्येक खेलको म्यान अफ द म्याच हुने खेलाडीले दुई हजार रुपियाँ प्राप्त गर्ने छन् ।

बागलुङ नगरपालिकाले २०७४ सालमा पहिलो र २०७६ सालमा दोस्रो मेयर कप फुटबल प्रतियोगिता सञ्चालन गरेको थियो । त्यसपछि रोकिएको प्रतियोगितालाई यस वर्षबाट पुनः आयोजना गरिएको हो ।