लैङ्गिक हिंसाविरुद्ध एकजुट होऔँ : आइजिपी कार्की

गोरखापत्र समाचारदाता 

काठमाडौँ,मङ्सिर १४ गते । प्रहरी महानिरीक्षक (आइजिपी) दानबहादुर कार्कीले महिला तथा बालबालिका माथि भएका हिंसाविरुद्ध एकजुट हुनपर्ने बताउनु भएको छ ।

प्रविधिको सही प्रयोग गरौंः लैङ्गिक हिंसा अन्त्य गरौं, लैङ्गिक हिंसारहित प्रविधि, सुरक्षा र न्यायको विधि अभियानका साथ  आइतबारदेखि प्रहरी प्रधान कार्यालयले देशभर लैङ्गिक हिंसाविरूद्धको १६ दिने अभियान सञ्चालन गरेको छ । 

अभियानको शुभारम्भ समारोहलाई सम्बोधन गर्नुहुँदै आइजिपी कार्कीले महिला तथा बालबालिकामाथि भइरहेका विभिन्न प्रकारका हिंसात्मक घटना र बढ्दो तथ्याङ्कबारे सबै सरोकारवाला निकाय गम्भीर हुनुपर्ने बताउनुभयो ।  

लैङ्गिक हिंसाका घटनाले व्यक्ति, परिवार र समाजलाई समेत असर पार्ने भएकाले न्यूनीकरणका लागि सरोकारवाला सबै पक्षको सामूहिक प्रयास आवश्यक रहेको बताउनु हुँदै आइजिपी कार्कीले भन्नुभयो ‘‘लैङ्गिक हिंसाका बहुआयमिक रूप र बहुपक्षीय असर छन् यसको रोकथामका लागि बहुआयमिक सहकार्य र समन्वयबाट आवश्यक छ ।’’ 

उहाँले लैङ्गिक हिंसा नियन्त्रणका लागि रणनीतिक योजना तर्जुमा, सफल अनुसन्धान, पीडित सहायताका लागि समाज एवम् सबै सरोकारवाला निकायबाट प्राप्त निर्देशन, राय सुझाव, सल्लाह तथा सहयोगप्रति कृतज्ञता व्यक्त गर्नुभयो ।

सो अवसरमा कार्कीले आर्थिक वर्ष २०८१-०८२ को लैङ्गिक हिंसाको वार्षिक तथ्यपत्र सार्वजनिक गर्नुहुँदै लैङ्गिक हिंसा न्यूनीकरणमा उल्लेखनीय भूमिका निर्वाह गर्नुहुने प्रहरी कर्मचारीहरूलाई प्रशंसापत्र तथा नगद पुरस्कार समेत प्रदान गर्नुभयो । 

उहाँले लैङ्गिक हिंसा न्यूनीकरणको क्षेत्रमा नेपाल प्रहरीसँग सहकार्य र समन्वय गर्दै आइरहेका विभिन्न राष्ट्रिय र अन्तर्राष्ट्रिय निकाय, सङ्घसंस्थाहरू र सरोकारवाला संस्थाहरूको भूमिकाको उच्च प्रशंसा गर्दै आगामी दिनहरूमा अझ प्रभावकारी समन्वय, सहकार्य र सहयोगमा निरन्तरताको अपेक्षा रहेको उहाँले बताउनुभयो । 

उहाँले यो अभियानलाई केवल समय अवधिमा सीमित नरही वर्षभरि उत्तिकै ऊर्जाका साथ सम्बन्धित सबै निकायहरूले आ–आफ्नो क्षेत्रबाट भूमिका निर्वाह गर्नुपर्नेमा जोड दिनुभयो । 

प्रविधिको उच्चतम प्रयोग र एआइको विकास र प्रविधिको प्रयोगले हिंसा न्यूनीकरणमा थप चुनौती देखापरेको उल्लेख गर्दै नेपाल प्रहरीले लैङ्गिक समानता र महिला सुरक्षा प्रति शून्य सहनशीलताको नीति अवलम्बन गरी विभिन्न सङ्घ संस्थाहरू, शैक्षिक संस्थाहरू, स्थानीय तह र महिला सञ्जालहरूसँग समेत समन्वय गरी हिंसाविरूद्धका सचेतनामूलक कार्यक्रम सञ्चालनलाई निरन्तरता दिँदै आइरहेको बताउनुभयो । 

प्रहरी प्रधान कार्यालय अपराध अनुसन्धान विभागका प्रमुख प्रहरी अतिरिक्त महानिरीक्षक सुशील सिंह राठौर, युनिसेफ नेपाल चिफ अफ चाइल्ड प्रोटेक्सन लियोन मुवोनी, प्रहरी प्रधान कार्यालय महिला, बालबालिका तथा जेष्ठ नागरिक सेवा निर्देशनालयका प्रमुख प्रहरी नायब महानिरीक्षक दीपककुमार बस्नेतले आफ्नो धारणा राख्नुभएका थियो ।

त्यसैगरी, गृह मन्त्रालय, राष्ट्रिय महिला आयोग, महिला, बालबालिका तथा जेष्ठ नागरिक मन्त्रालयलगायतका प्रतिनिधिहरूले लैङ्गिक हिंसाका घटना र यसको निराकरणबारे आ–आफ्नो धारणा व्यक्त गर्नुभएको थियो ।

कार्यक्रममा उच्च प्रहरी अधिकारीसहित देशभरका प्रहरी कार्यालयहरूका प्रमुख तथा प्रतिनिधिहरू प्रत्यक्ष तथा भर्चुअल उपस्थिति रहेको थियो ।