अर्जुन काफ्ले
स्याङ्जा, मङ्सिर १४ गते । उपन्यासकार छवि वैरागी घिमिरेको दोस्रो औपन्यासिक कृति ‘विविशारा” को विमर्श एवम् सिर्जना वाचन गरिएको छ । स्याङ्जामा साहित्यिक पुनर्जागरणको छैटौँ वर्षोत्सवको सन्दर्भमा वैकल्पिक बाटो पृथक पाइला सिर्जनात्मक अभियान २०७६, स्याङ्जाको ३७ औँ पाइलाको रूपमा औपन्यासिक कृतिको विमर्श एवम् सिर्जना वाचन गरिएको हो ।
हालको टेम्केमयुँ गाउँपालिका– ६, भोजपुरमा जन्मिनु भएका छन्दकवि एवम् आख्यानकार छवि घिमिरे हाल सुन्दरहरैँचा नगरपालिका– ९, विराटचोक, मोरङमा रहेर सिर्जना कर्ममा क्रियाशील रहनुभएको छ ।
संस्कृतमा आचार्यसम्मको औपचारिक अध्ययन पूरा गर्नु भएका वैरागी घिमिरेको ‘विविशारा’ दोस्रो औपन्यासिक कृति हो ।
रेडियो सञ्चारकर्मीका रूपमा एक दशक काम गर्नु भएका घिमिरे हाल एक दर्जन हाराहारी साहित्यिक संस्थाको नेतृत्वदायी भूमिकामा रहनुभएको छ ।
साधकका रूपमा समेत परिचित उहाँका दर्जन हाराहारीमै विभिन्न साहित्यिक कृति प्रकाशित भएका छन् । संसारमा अलौकिक प्रेम अझै मरेको छैन, विश्वास गर्न सकियो भने त्योभन्दा मजबुत अर्को खुशीको जीवन पनि छ भन्ने विषयलाई मूल कथ्य बनाइएको “विविशारा” उपन्यास फिनिक्स बुक्स, काठमाडौँले प्रकाशित गरेको हो ।
पहिलो चरणमा “विविशारा” औपन्यासिक कृति माथि केन्द्रित रहेर वक्ता लक्ष्मीप्रसाद रेग्मी र शान्ता थापाले समीक्षात्मक मन्तव्य प्रस्तुत गर्नु भएको थियो भने उपन्यासकार छवि वैरागी घिमिरेले लेखकीय मन्तव्य प्रस्तुत गर्नु भएको थियो ।
अनौपचारिक रूपमा आयोजना गरिएको कार्यक्रमको संयोजन युवा कवि तथा साहित्यिक अभियन्ता मिलन समीरले गर्नुभएको थियो भने कार्यक्रमको दोस्रो चरणमा स्याङ्जाली स्रष्टाहरु विष्णु पङ्गेनी पाण्डे, बोधराज न्यौपाने, राजु गैह्रे, लीलाप्रसाद रेग्मी, अग्निकुमार रेग्मी पल्लव, कमलप्रसाद बगाले, इन्द्रप्रसाद पाठक, झवनाथ बस्याल, दमकुमारी बगाले, युवराज सुवेदी, वसन्त खनाल, प्रेमप्रसाद सुवेदी, दिलीप तिवारी, ढालबहादुर केसी, लेखनाथ काफ्ले, शम्भु अर्याल, अनन्त अर्याल, धु्रवप्रसाद शर्मा पङ्गेनी, युवराज सुवेदी लगायतले आफ्ना रचनाहरु वाचन गर्नु भएको थियो ।
