अमृतप्रसाद पौडेल
म्याग्दी, मङ्सिर ११ गते । डिफेन्डिङ च्याम्पियन माउण्ट एभरेष्ट आवासीय माविले २३ औँ अन्तर मावि जेसीजकप फुटवल प्रतियोगितामा विजयी यात्रालाई जारी राख्दै क्वाटर फाइनलमा प्रवेश गरेको छ ।
बुद्ध एकेडेमीलाई ६–० गोलले पराजित गर्दै क्वाटर फाइनललमा प्रवेश गरेको हो । त्यस्तै, अर्को खेलमा बेनी सामुदायिक माध्यमिक विद्यालयले जनप्रिय मावि दरवाङलाई दुई शून्य गोलअन्तरले पराजित गरेको छ ।
यसअघि भएका खेलहरुमा केबी एकेडेमी दरबाङले ८–१ गोलले गलेश्वर मावि तोरिपानीलाई पराजित गरेको छ । त्यसैगरी बेनी आवासीय मावि ३–१ गोल प्रहार गर्दै शारदा मावि छिस्वाङलाई पराजित गरेको छ । प्रकाश मावि र लिटल एकेडेमीबिच निर्धारित समयमा १–१ गोल गरेपछि पेनाल्टी सुटआउटमा ९–८ गोल गर्दै लिटल गार्डेन एकेडमी अर्को चरणमा प्रवेश गरेको छ । निस्कोट मावि र जामुनाखर्क मावि १–० गोल गर्दै निस्कोट माविले जेसीज कपमा विजय यात्रा सुरु गरेको छ । जेसीज कप प्रतियोगिताको इतिहासमा निस्कोट पहिलोपटक सहभागि विद्यालय समेत हो ।
प्रतियोगिताको उपाधी दावेदार मानिएको न्यू वेष्ट पोइन्ट आवासीय मावि र प्रकाश मावि बाहिरिएका छन् । मङ्सिर १३ गते शनिबारसम्म हुने प्रतियोगितामा जिल्ला भित्रका १९ विद्यालयको सहभागिता रहेको प्रतियोगिताका मुल संयोजक नविन पौडेलले जानकारी दिनुभयो ।
प्रतियोगितामा प्रथम हुनेले रनिङ शिल्डसहित ट्रफी, मेडल, प्रमाणपत्रसहित नगद ५५ हजार पाँच सय ५५ र उपबिजेताले ट्रफि, मेडल र प्रमाणपत्रसहित नगद ३५ हजार पाँच सय ३५ पुरस्कार प्राप्त गर्ने शाखा अध्यक्ष बिनोद घर्तीले बताउनुभयो ।
प्रतियोगितामा उत्कृष्ट खेलाडी, सर्वाधिक गोलकर्ता, उत्कृष्ट गोलरक्षक, उत्कृष्ट स्ट्राइकर, उत्कृष्ट डिफेन्डर, उत्कृष्ट मिडफिल्डर, राइजीङ प्लेयर, उत्कृष्ट प्रशिक्षकलाई नगद दुई हजार पाँच सयसहित ट्रफी प्रदान गरिने छ । त्यस्तै, अनुसासित टिम र सेमिफाइनल पुग्ने दुई टिमलाई नगद पाँच हजारसहित सम्मान गरिने छ । प्रतियोगिता सञ्चालनको लागि एभरेष्ट ग्लोबल एजुकेसन भिसा सर्भिस मुख्य प्रायोजक रहेको छ भने गंगा जिसी फाउण्डेसन र प्रभु बैँक सहप्रायोजकको रुपमा रहेका छन् ।
