गुणबहादुर रोका
सुलीकोट, कात्तिक २६ गते । गत भदौ २३ र २४ गते भएको जेनजी आन्दोलनका क्रममा घाइते भएकाहरुलाई जिल्ला प्रशासन कार्यालय गोरखाले परिचय पत्र वितरण गर्ने भएको छ । जिल्ला प्रशासन कार्यालय गोरखाले एक सूचना जारी गर्दै जेनजी आन्दोलनका क्रममा गोरखाबाट घाइते भएका ८ जना घाइतेहरुलाई परिचयपत्र प्रदान गर्ने जनाएको छ ।
जेनजी आन्दोलनमा घाइते भई परिचयपत्र पाउनेहरुमा गोरखाबाट सन्तोष गुरुङ, दिवसबाबु श्रेष्ठ, कुमार अधिकारी, ध्रुव परियार, सञ्जिता गुरुङ, अर्जुन भट्ठ, रोशन रेग्मी र सुजित थापालाई नगद र घाइते परिचयपत्र वितरण गरिने गोरखाका सहयाक प्रमुख जिल्ला अधिकारी चित्राङ्गत बरालले बताउनुभयो ।
उहाँका अनुसार जेनजी आन्दोलनका क्रममा गोरखाका धेरै नागरिक घाइते भएका थिए । तीमध्ये पहिलो चरणमा आठ जनालाई परिचयपत्र वितरण गर्न लागिएको हो । बाँकी घाइतेहरुको विवरण सङ्कलन गरी क्रमशः सबैलाई वितरण गरिने तयारी भइरहेको छ ।
जेनजी आन्दोलनका घाइतेहरुलाई स्वास्थ्य तथा जनसङ्ख्या मन्त्रालयबाट प्राप्त भैपरी खर्चवापतको २० हजार रुपियाँसमेत वितरण गरिने जिल्ला प्रशासन कार्यालय गोरखाले जनाएको छ । सरकारले आन्दोलनका क्रममा घाइते भएकाहरुलाई पछि नीति बनाएर सेवा सुविधा दिन सक्छ भनेर परिचयपत्र वितरण गर्न लागिएको सहायक प्रमुख जिल्ला अधिकारी बरालको भनाइ छ ।
घाइतेलाई वितरण गरिने परिचय पत्र केवल प्रमाणपत्र मात्र होइन, सहायक प्रमुख जिल्ला अधिकारी बरालले भन्नुभयो, ‘आन्दोलनमा घाइते भएका नागरिकप्रति राज्यको जिम्मेवारी र सम्मानको प्रतीक पनि भएको छ।’
सरकारले पछि नीति बनाएर घाइतेहरुको उपचार, राहत, रोजगारीमा प्राथामिकता तथा सामाजिक सुरक्षा योजनामा सहभागी गराउनका लागि पनि परिचयपत्र वितरण गरिएको जिल्ला प्रशासन कार्यालय गोरखाले जनाएको छ ।
