हरिकृष्ण ऐडी
मुगु, असोज ३१ गते । मुगुको छायानाथ रारा नरपालिका र ललितपुर महानगरपालिकाबिच आपसी सहकार्य र धार्मिक पर्यटन प्रवर्धनमा जोड दिँदै भगिनी सम्बन्ध स्थापना भएको छ । मुगुको छायानाथ रारा नगरपालिकाका नगर प्रमुख विष्णुकुमार भाम र ललितपुर महानरपालिकाका प्रमुख चिरीबाबु महार्जनबिच बिहिवार छायानाथ रारा नगरपालिकाको कार्यालयमा भगिनी सम्बन्ध स्थापना गर्ने सहमति भएको हो ।
छायानाथ रारा नगरपालिकाका नगरप्रमुख भामले मुगुमा धार्मिक पर्यटनको सम्भावना धेरै रहेको उल्लेख गर्दै काठमाडौँ हुँदै मुगुको रारा ताल, छायानाथ धामसम्मको सडक निर्माण र यहाँको पर्यटकीय गन्तव्यको प्रचारप्रसारमा पालिकाबिच जोड भएमा यहाँका स्थानीयलाई समृद्धिमा उल्लेखनीय योगदान पुग्ने उहाँले बताउनुभयो ।
काठमाडौँका धार्मिक तीर्थस्थल मुगुसम्म जोड्न सकियो भने भारतीय र तिब्बती पर्यटकको आगमन बढाउन सकिने सम्भावना रहेको भन्दै उहाँले छायानाथ रारा नगरपालिकाले त्यसका लागि आवश्यक पहल र समन्वय गरिरहेको बताउनुभयो ।
नगरप्रमुख भामका अनुसार नेपालको सबैभन्दा ठुलो र सुन्दर रारा ताल, त्यसैगरी चारधाममध्येको सबैभन्दा जेठो छायानाथ धामलाई धार्मिक पर्यटकीय गन्तव्यका रूपमा विकास गर्न ललितपुर महानगरपालिकालाई भगिनी मैत्रीपूर्ण सम्बन्धका आधारमा सहकार्य गरिने उल्लेख गरिएको छ । साथै मुगुको राराताल हुँदै छायानाथ धामसम्म पदमार्गलाई आधार बनाएर धार्मिक तथा सांस्कृतिक पर्यटन विस्तार गर्ने कार्यक्रम सञ्चालन गरिनेछ ।
नगर प्रमुख भामले भन्नुभयो, ‘‘ललितपुर महानगरपालिकाको आर्थिक सहयोगमा यो आर्थिक वर्षको मङ्सिरदेखि पर्यटकीय क्षेत्र रारा ताल र जिल्लाको सदरमुकामसम्म दुई सय वटा सोलार लाइट जडान हुनेछन् ।’’
ललितपुर महानगरपालिकाका प्रमुख चिरीबाबु मर्जनका अनुसार दुर्गम हिमाली जिल्ला मुगुको छायानाथ रारा नगरपालिकासँग भगिनी सम्बन्ध स्थापना भएर पर्यटन, विकास र सेवा प्रवाहका क्षेत्रमा अनुभव आदानप्रदान गर्न पाउँदा हामी उत्साहित भएको बताउँदै हाम्रो उद्देश्य प्रशासनिक मात्र नभई सांस्कृतिक र जनस्तरको सम्बन्धलाई पनि मजबुत बन्नेछ ।
दुवै पालिकाले स्थानीय उत्पादनको प्रवर्धन, बजार व्यवस्थापन, पर्यटन पूर्वाधारको विकास र धार्मिक सम्पदाको संरक्षणमा आपसी सहकार्य गर्ने प्रतिबद्धता व्यक्त भएका छन् ।
धार्मिक पर्यटन प्रवर्धनमा नीति, योजना र कार्यान्वयनका विषयमा छलफल गरिने उल्लेख गरिएको छ । ललितपुर महानरपालिकाले मुगुको स्थानीय उत्पादनको प्रवर्धनमा त्यसैगरी धार्मिक र पर्यटन क्षेत्रमा प्रचारप्रसार गर्नेगरी सहमति भएको छ ।
ललितपुर महानगरपालिकाको टोली अहिले मुगु जिल्लाको पर्यटन र धार्मिक क्षेत्रको भ्रमणमा छ । ललितपुर महानगरपालिकाको उक्त भ्रमणले मुगुको स्थानिय उत्पादनदेखि धार्मिक पर्यटकीय गन्तव्यका रूपमा प्रभावकारी विकास गर्न सहयोग पुग्ने विश्वास नागरिक समाजका अभियन्ता रुपबहादुर मल्लले लिनुभएको छ ।
