कञ्चनपुर, असोज ३० गते । यहाँको लालझाडी गाउँपालिका–२, कञ्जमा बाढी प्रभावित समुदायका लागि सुरक्षित आवास (सेफ हाउस) निर्माण गरिने भएको छ । गाउँपालिका र ‘पेशवान’ नामक गैरसरकारी संस्थाको संयुक्त लगानीमा सुरक्षित आवास निर्माण सुरु गरिएको हो ।
गाउँपालिकाका अध्यक्ष निर्मल रानाका अनुसार ५९ लाखमा ठेक्का प्रक्रियामार्फत सुरक्षित आवास भवन निर्माण सुरु गरिएको छ । “समुदायका लागि जलवायु उत्थानशील कार्यक्रमअन्तर्गत निर्माण भइरहेको सुरक्षित आवासका लागि गाउँपालिकाले पाँच लाख लगानी गरेको छ”, अध्यक्ष रानाले भन्नुभयो, “बाँकी रकम संस्थाले बेहोरेको छ ।”
दोदा नदीको बाढी प्रभावित बासिन्दालाई सुरक्षित आवासमा खाद्यान्न तथा अतिआवश्यक सामग्री भण्डारण गर्ने, बालबालिका, वृद्ध, असक्त, अपाङ्गता भएका व्यक्ति र महिलालाई सुरक्षित बसोवास गर्न सहज होस् भन्ने उद्देश्यले आवास निर्माण गरिएको पेशवानका प्राविधिक जनक लेखकले बताउनुभयो । उहाँका अनुसार सो भवनमा सामुदायिक विपद् व्यवस्थापन समितिले छलफल, बैठक तथा तालिमका कार्यक्रम सञ्चालन गर्न पनि सहज हुने छ ।
यसैगरी, पुनर्नवास नगरपालिका–५, रातोताल सिम्रीमा पनि पालिकासँगको सहकार्यमा ४६ लाख लागतमा अर्को दुई तले सुरक्षित आवास निर्माण अगाडि बढाइएको छ । रासस
-original-thumb.jpg)