- शान्ति सुरक्षाको आवश्यक प्रबन्ध गरी निष्पक्ष र भयरहित वातावरणमा निर्वाचन गराउने विश्वास आमनागरिकलाई दिलाउन सरकारलाई राष्ट्रपतिको सुझाव
- स्वतन्त्र, निष्पक्ष र भयरहित निर्वाचन गराउने प्रधानमन्त्री कार्कीको प्रतिबद्धता
- जेनजी पुस्ता हामी सबैका छोराछोरी भएकाले उनीहरूबाट किन यस्तो असन्तुष्टि व्यक्त भयो भन्ने बुझेर परिवर्तनलाई आत्मसात् गर्दै अगाडि बढ्न दलहरूलाई आग्रह
- लोकतन्त्रमा विश्वास गर्ने राजनीतिक दल निर्वाचनमा जान सधैँ तयार रहेको र त्यसका लागि सरकारले वातावरण बनाउनुपर्ने दलका प्रतिनिधिको भनाइ
अशोक अधिकारी/सूर्य पाण्डे
काठमाडौँ, असोज २५ गते । जेनजी विद्रोहबाट सत्ता उथलपुथल भएको लामो समयपछि बल्ल विघटित सङ्घीय संसद्मा प्रतिनिधित्व गर्ने राजनीतिक दल सर्वदलीय परामर्शमा जुटेका छन् । राष्ट्रपति रामचन्द्र पौडेलको आह्वान एवं प्रधानमन्त्री सुशीला कार्कीको उपस्थितिमा जेनजी आन्दोलन, नयाँ सरकार, फागुन २१ गतेका लागि घोषित निर्वाचन र समसामयिक राजनीतिक विषयमा दलहरू संवादमा जुटेका हुन् ।
सिंहदरबार, सर्वोच्च अदालत, सङ्घीय संसद् भवनसहित देशभर प्रशासनिक भवन, प्रमुख दलका नेताका घरसम्पत्ति एवं व्यापारिक प्रतिष्ठान जलेर नष्ट भएसँगै नयाँ सरकार गठन र देश क्रमशः लयमा फर्किने प्रयासमा रहँदा राष्ट्रपति पौडेल सरकार र दलबिच संवादको वातावरण बनाउन अग्रसर हुनुभएको हो । बैठकमा दलका नेताले निर्वाचनमा जाने नजाने तय भइनसकेको र केन्द्रीय कार्यसमितिबाट निर्णय गर्ने बताउँदा प्रधानमन्त्री कार्कीले भने निर्वाचनको वातावरण बनाउने प्रतिबद्धता व्यक्त गर्नुभयो । दलका नेताको अभिव्यक्ति केही जिम्मेवार र केही आक्रोशयुक्त पनि रहेको बैठकमा सहभागीले जनाएका छन् ।
निर्वाचनमा केन्द्रित हुन आग्रह
राष्ट्रपति रामचन्द्र पौडेलले देश, जनता, लोकतन्त्र र संविधानको रक्षाका लागि निर्वाचन एक मात्र विकल्प भएको प्रस्ट पार्नुभयो । उहाँले फागुन २१ गतेका लागि तय भएको प्रतिनिधि सभा निर्वाचनमा केन्द्रित हुन दलहरूलाई आग्रह गर्नुभयो । राष्ट्रपति पौडेलले लोकतन्त्रको रक्षाका लागि सबै मिलेर निर्वाचन सम्पन्न गराउनुपर्ने बताउँदै राजनीतिक दलमा कुनै दुबिधा र अस्पष्टता भए बैठकमा राख्न आग्रह गर्नुभयो । उहाँले निर्वाचनबाहेक अन्य विकल्प खोज्न थालिएमा यसले देशलाई कहाँ पु¥याउँछ भन्ने पनि सोच्न आग्रह गर्नुभयो ।
उहाँले पार्टीहरूले पनि कुनै किसिमको दुबिधा सिर्जना नगरी जेन्जीको माग पनि आफूहरूले पूरा गर्ने भनेर जनतामा जान आग्रह गर्दै दलहरूको सुरक्षाको चिन्तालाई सरकारले तत्काल सम्बोधन गर्नुपर्ने बताउनुभयो । राष्ट्रपतिका प्रेस सल्लाहकार किरण पोखरेलका अनुसार राष्ट्रपति पौडेलले शान्ति सुरक्षाको आवश्यक प्रबन्ध गरी निष्पक्ष र भयरहित वातावरणमा निर्वाचन गराउने विश्वास आमनागरिकलाई दिलाउन सरकारलाई सुझाव दिनुभयो ।
भयरहित निर्वाचन हुन्छ : प्रधानमन्त्री
प्रधानमन्त्री सुशीला कार्कीले दलहरूको सहभागिताबिना निर्वाचन नहुने विषयमा सरकार जानकार रहेको बताउनुभयो । उहाँले स्वतन्त्र निष्पक्ष र भयरहित निर्वाचन गराउन सरकारले शान्ति सुरक्षाको प्रबन्ध गर्ने विश्वास दिलाउनुभयो । उहाँले जेनजीहरू हामी सबैका छोराछोरी भएकाले उनीहरूबाट किन अहिले यस्तो असन्तुष्टि व्यक्त भयो भन्ने बुझेर परिवर्तनलाई आत्मसात् गर्दै अगाडि बढ्न दलहरूलाई आग्रह गर्नुभयो ।
राजनीतिक दलको आग्रह
राजनीतिक दलका नेताले लोकतन्त्रमा विश्वास गर्ने राजनीतिक दल निर्वाचनमा जान सधैँ तयार रहेको बताएका छन् । बैठकमा सहभागी नेकपा (एकीकृत समाजवादी) का नेता राजेन्द्रप्रसाद पाण्डेका अनुसार दलका प्रतिनिधिले निर्वाचनको वातावरण, लुटिएका हतियारबाट हुने खतरा र सरकार निर्वाचनप्रति गम्भीर छ÷छैन भन्ने कुरा बैठकमा राख्नुभएको थियो ।
पाण्डेले भन्नुभयो, “अझै पनि प्रहरीबाट लुटिएका हतियार कहाँ छन् भन्ने प्रस्ट छैन । सरकारले निर्वाचन गराउने हो कि नेता थुन्नेतर्फ लाग्ने हो ? सुरक्षाको प्रत्याभूति कसरी गर्ने हो भन्नेलगायत समग्र विषयमा सरकारको ध्यानाकर्षण गराइएको छ ।”
उहाँका अनुसार कांग्रेस र एमालेका नेताले केन्द्रीय कार्यसमिति बैठक बसेपछि मात्रै निर्वाचनमा सहभागी हुने सन्दर्भमा निर्णय गर्ने प्रस्ट पारेका छन् । अन्य नेताले अहिलेको सुरक्षा व्यवस्थाले निष्पक्ष र स्वतन्त्र वातावरणमा निर्वाचन हुने विषयमा संशय पैदा भएको बताए । उनीहरूले यो शङ्का र संशय हटाएर निष्पक्ष, स्वतन्त्र र भयरहित वातावरणमा निर्वाचन सम्पन्न हुने विश्वास दिलाउन सरकारले सक्नुपर्ने बताए ।
जेनजी प्रतिनिधिसँग पनि छलफल
राष्ट्रपति पौडेलले शनिबार जेनजीका प्रतिनिधिसँग पनि निर्वाचनका सन्दर्भमा परामर्श गर्दै हुनुहुन्छ । सरकारसँग निरन्तर संवादमा रहेका जेनजी प्रतिनिधिलाई उहाँले छलफलका लागि बोलाउनुभएको छ । प्रेस सल्लाहकार पोखरेलले भन्नुभयो, “निर्वाचन र निर्वाचनका लागि वातावरण बनाउने सन्दर्भमा नै जेनजीका प्रतिनिधिसँग राष्ट्रपतिले छलफल गर्दै हुनुहुन्छ ।”
सर्वदलीय बैठकमा नेपाली कांग्रेसका उपसभापति पूर्णबहादुर खड्का र महामन्त्री गगनकुमार थापा, नेकपा (एमाले) का वरिष्ठ उपाध्यक्ष ईश्वर पोखरेल र महासचिव शङ्कर पोखरेल, नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठ, उपमहासचिव वर्षमान पुन सहभागी हुनुहुन्थ्यो ।
राष्ट्रिय स्वतन्त्र पार्टीका कार्यवाहक सभापति डोलप्रसाद अर्याल र सहमहामन्त्री विपिनकुमार आचार्य, राष्ट्रिय प्रजातन्त्र पार्टीका प्रवक्ता ज्ञानबहादुर शाही र मीना लामा, एकीकृत समाजवादीका वरिष्ठ उपाध्यक्ष राजेन्द्रप्रसाद पाण्डे र महासचिव धनश्याम भुसाल सहभागी हुनुहुन्थ्यो ।
त्यस्तै जनता समाजवादी पार्टीकी नेतृ रेनु यादव, जसपा नेपालका नेता विद्युत् वज्राचार्य र प्रकाश अधिकारी, जनमत पार्टीका अध्यक्ष डा. चन्द्रकान्त (सिके) राउत र डा. जयकुमार राउत, लोकतान्त्रिक समाजवादी पार्टीका ज्ञानेन्द्र झा र सर्वेन्द्रनाथ शुक्ला, नागरिक उन्मुक्ति पार्टीका नेता रेशमलाल चौधरी र नेपाल मजदुर किसान पार्टीका नेता सुनील प्रजापती सहभागी हुनुहुन्थ्यो ।
