गोरखापत्र अनलाइन
काठमाडौँ, असोज २४ गते । नेकपा (एमाले) को सचिवालय बैठकमा वर्तमान समस्याको समाधान महाधिवेशनबाट खोज्ने तथा पार्टीलाई नयाँ ढङ्गबाट अगाडि बढाउने विषयमा प्रस्ताव तयार गर्ने विषयमा छलफल गरेको छ ।
एमाले उपमहासचिव प्रदीप ज्ञवालीले गुण्डुमा बसेको एमाले सचिवालय बैठकमा भएको छलफलबारे जानकारी गराउँदै सो कुरा बताउनुभएको हो । वर्तमान सरकार निर्वाचन गराउने बाटोमा नभइ अनावश्यक तिक्तता र तनावतर्फ उद्वत रहेको पनि एमालेको बुझाइ रहेको उहाँले बताउनुभयो । अहिले सिङ्गो देशलाई एक ठाउँमा उभ्याउने वातावरण निर्माण गर्नुपर्छ भन्ने विषयमा छलफल भएको उहाँले जानकारी दिनुभयो ।
उहाँले भन्नुभयो, “अहिले उठेका सबै प्रश्नहरुको जवाफ महाधिवेशनबाटै खोज्नुपर्छ र पार्टीलाई नयाँ ढङ्गले अगाडि बढाउन छिट्टै महाधिवेशन गर्नुपर्छ भन्ने विषयमा छलफल भएको छ । सम्भवतः भोलि हामीले यसको प्रस्ताव तयार गर्छौं । यिनै विषयमा छलफल भएका छन् ।”
उहाँले वर्तमान सरकारले दलहरुलाई साथमा लिनुपर्नेमा उल्टो सरकार निषेधको बाटोबाट अघि बढेको उहाँले आरोप लगाउनुभयो । उहाँले भन्नुभयो, “मुलुकलाई यतिबेला विभाजित भएको मनस्थितिलाई जोडेर राष्ट्रिय एकता कायम गर्नुपर्ने हो । त्यसका लागि सबै दलहरुलाई साथमा लिएर अघि बढ्नुपर्ने हुन्छ । तर, सरकार दलहरुलाई साथमा लिने होइन कि निषेधको बाटोबाट अगाडि बढिरहेको अनुभूति भएको छ।”
राजनीतिक नेताहरुमाथि बौद्धिक आक्रमण र धम्कीहरु आएको तर अर्कातिर प्रहरीलाई कुटीकुटी हत्या गर्ने, प्रहरीको हतियार लुट्नेहरुलाई गृहमन्त्रीको दबाबमा सजिलै छाड्ने गलत काम भइरहेको उहाँले टिप्पणी गर्नुभयो ।
उहाँले भन्नुभयो, “शान्तिपूर्ण ढङ्गले गतिविधि गर्न अरु पार्टीलाई रोक लगाउने, नेताहरुलाई स्थानहद तोक्ने कुराले वर्तमान सरकार निर्वाचन गर्ने, गराउने बाटोतिर होइन, वास्तवमा मुलुकको लागि अनावश्यक तिक्तता, तनाव, मुडभेडतिर लैजान उद्वत छ भन्ने देखिन्छ । यस्तो परिस्थिति अविलम्ब अन्त्य गरिनुपर्छ ।”
