अमरराज नहर्की
तनहुँ, साउन २९ गते । तनहुँको म्याग्दे गाउँपालिकाले विपन्न जनतालाई सुरक्षित आवास निर्माण कार्यलाई निरन्तरता दिएको छ । चालु आर्थिक वर्ष २०८२-८३ मा विपन्नलाई आवास निर्माण कार्यका लागि निरन्तरता दिइएको गाउँपालिकाले जनाएको छ ।
गाउँपालिकाले चालु आर्थिक वर्षको वार्षिक स्वीकृत कार्यक्रम तथा नेपाल सरकारको विशेष अनुदान योजनाअन्तर्गत १२ जनाको निर्माण गरिने प्रमुख प्रशासकीय अधिकृत नारायणप्रसाद अधिकारीले जानकारी दिनुभयो ।
नमुना आवास कार्यक्रमअन्तर्गत १२ वटा घर निर्माण गर्ने निर्णय अनुसार गाउँपालिकाका वडा नम्बर १ देखि वडा ७ मा रहेका लक्षित गाउँपालिकाको आर्थिक विपन्न वर्गलाई नमुना आवास कार्यक्रम कार्यविधि ९२०८०० को दफा ९३० अनुरूप मापदण्ड तथा सूचीभित्र पर्ने स्थानीय नागरिकलाई घर बनाएर हस्तान्तरण गरिने अधिकारीले बताउनुभयो ।
अधिकारीका अनुसार आव २०८१-८२ मा ४८ जना विपन्नको आवास निर्माण गरी घर हस्तान्तरण गरिएको थियो । निवेदनसँग जग्गाधनी प्रमाणपुर्जा प्रतिलिपि, नागरिकताको प्रतिलिपि तथा सम्बन्धित वडाको आर्थिक विपन्न परिवार भएको सिफारिस आवश्यक पर्छ । नयाँ आवास पाउने नागरिकको मापदण्डभित्र सामान्य प्रकृतिका श्रम (दैनिक जीविकोपार्जन गर्ने तथा कृषिमा आधारित) बाहेक परिवार सदस्यमा कोही स्थायी रोजगार तथा दिगो आयस्रोत नभएको वा अति गरिब तथा न्यून वर्गमा पर्नुपर्ने छ । त्यस्तै विगत आर्थिक वर्ष २०८१-८२ मा निवेदन दर्ता गरी छनोटमा नपरेका व्यक्तिले पुनः निवेदन दिन पाउने छन् ।
विपन्न नागरिकहरू घरविहीन नहुन् भनेर सम्बन्धित वडाको सिफारिसको आधारमा निर्माण गरिएको गाउँपालिकाका अध्यक्ष श्रीप्रसाद श्रेष्ठले बताउनुभयो । परिवार सदस्यमा कोही स्थायी रोजगार तथा दिगो लगानी तथा आयस्रोत नभएको, दोहोरो सुविधा तथा अनुदान नलिएको प्रमाण पेस गर्नुपर्ने प्रावधान राखिएको उहाँले जानकारी दिनुभयो ।
अपाङ्गता भएका व्यक्ति, असहाय, सिमान्तकृत जाति, अल्पसङ्ख्यक जाति वा दलित जातिमा सूचीकृत भएकालाई प्राथमिकता दिइएको उपाध्यक्ष बालकृष्ण घिमिरेले जानकारी दिनुभयो ।
