नवराज नेपाली
बागलुङ (गलकोट) २९ गते । बागलुङमा रहेको पर्यटन तथा उद्योग कार्यालय पर्वतमा गाभिएको विरोधमा बागलुङका राजनैतिक दल र व्यवसायीहरु विरोधमा उत्रिएका छन् । गत सोमबार गण्डकी प्रदेश सरकारको मन्त्रिपरिषद्को निर्णयले प्रदेश भरिका विभिन्न कार्यालय खारेजी गर्ने र गाभ्ने निर्णय गरेको थियो ।
सोही निर्णयमा बागलुङमा रहेको पर्यटन उद्योग कार्यालय पर्वतमा गाभिए पनि यहाँका राजनितिक दल सरोकारवालाहरु एकजुट भएका हुन् । जिल्लामा क्रियाशील राजनीति दलले संयुक्त विज्ञप्ति जारी गर्दै गण्डकी प्रदेश सरकारको विभिन्न संरचना र कर्मचारी घटाउने निर्णय अन्तर्गत ६ हजार सेवाग्राही रहेको कार्यालय अन्य स्थानमा गाभिएको प्रति आपत्ति जनाएका छन् ।
प्रदेश प्रशासनिक संरचना पुनरवलोकन अध्ययन तथा सुझाव समितिको प्रतिवेदन विपरीत पर्यटन तथा उद्योग कार्यालय बागलुङलाई स्थानान्तरण गरी पर्वत लैजाने गण्डकी प्रदेश सरकारको निर्णयप्रति बागलुङका राजनैतिक दल र सरोकारवालाहरुले असहमति व्यक्त गर्दै तत्काल निर्णय सच्याउन जोडदार माग गरेका छन् ।
नेपाली कांग्रेसका सचिव हरिहर शर्मा, एमाले बागलुका अध्यक्ष हीराबहादुर केसी, नेकपा माओवादी केन्द्रका नगरकमिटी अध्यक्ष टीका बिक, रास्वपाका खिमानन्द पौडेल, राजमोका विष्णुप्रसाद अधिकारी, नेपाल समाजवादी पार्टी नेपालका कृष्ण शर्मा र बागलुङ उद्योग वाणिज्य सङ्घका अध्यक्ष राजनकुमार शाक्यद्वारा संयुक्त रुपमा जारी विज्ञप्तिमा पोखरापछिको दोस्रो व्यापारिक केन्द्रबाट उद्योग कार्यालय खारेजी गर्ने निर्णय सच्याउन माग गर्नुभएको हो।
विज्ञप्तिमा भनिएको छ, "बागलुङ जिल्ला गण्डकी प्रदेशकै दोस्रो व्यापारिक केन्द्र तथा साविकको धौलागिरी अञ्चलको सदरमुकामको रुपमा रहेको जिल्ला हो । हाल जिल्लामा पर्यटन तथा घरेलु कार्यालयमा दर्ता अभिलेख कायम भएका करिब छ हजार उद्यमी व्यवसायी छन् भने पर्यटकीय दृष्टिकोणले पोखरापछिको दोस्रो गन्तव्यको रुपमा बागलुङ छ । यसै सन्दर्भमा गण्डकी प्रदेश सरकारको विभिन्न कार्यालय र कर्मचारी घटाउने तथा समायोजन गर्ने निर्णय गरेको छ जुन स्वागतयोग्य छ । यद्यपि पूर्व सचिव शङ्करचन्द्र पौडेलको संयोजकत्वमा प्रदेश सरकारबाट गठित प्रदेश प्रशासनिक संरचना पुनरवलोकन अध्ययन तथा सुझाव समितिको प्रतिवेदन विपरीत बागलुङमा रहनुपर्ने पर्यटन तथा उद्योग कार्यालय पर्वत जिल्ला लैजाने भन्ने प्रदेश सरकार मन्त्रिपरिषद्को निर्णयप्रति जिल्लामा रहेका राजनीतिक दल र सरोकारवाला निकायको गम्भीर असहमति छ ।"
प्रतिवेदनमा सम्पूर्ण तथ्याङ्कहरुका आधार र संरचनागत अवस्था उत्कृष्ट गरेको आधारलाई प्राथमिकतामा राखेर प्रदेश सरकारबाट भएको निर्णय तत्कालै सच्याई, पर्यटन तथा उद्योग कार्यालय बागलुङ यथास्थानमा नै कायम गर्नका लागि प्रदेश सरकारसँग अनुरोध गर्दै, हामीलाई आन्दोलित हुने अवस्था सिर्जना नगर्नु हुनसमेत खबरदारीसहित प्रदेश सरकारको ध्यानाकर्षण गर्दछौं ।
