गाईघाट समाचारदाता
गाईघाट, साउन २९ गते । उदयपुरको चौदण्डीगढी नगरपालिका–४ को शनिबारे क्षेत्रबाट अवैध रूपमा गिट्टी, माटो उत्खनन गरी बाहिरी जिल्लातिर लैजाँदै गरेको अवस्थामा इलाका प्रहरी कार्यालय बेलटारले १७ वटा टिप्पर नियन्त्रणमा लिएको छ । चौदण्डीगढी नगरपालिका–४ स्थित केशवबहादुर भुजेलको नम्बरी जग्गाबाट अवैध रूपमा माटो उत्खनन भइरहेको भन्ने सूचनाका आधारमा इलाका प्रहरी कार्यालय बेलटारको टोलीले ती टिप्पर मङ्गलबार साँझ नियन्त्रणमा लिएको थियो ।
उदयपुरका प्रमुख जिल्ला अधिकारी प्रेमप्रसाद लुइटेलका अनुसार सरकारले निषेध गरेको समय असार, साउन, भदौमा व्यक्तिको नम्बरी वा ऐलानी जग्गाबाट समेत कुनै पनि प्रकृतिको नदीजन्य पदार्थ वा ढुङ्गा, गिट्टी, बालुवा वा माटो उत्खनन गर्न वा ओसारपसार गर्न कानुनतः पाइँदैन ।
नियन्त्रणमा लिएर टिप्परबाट राजस्व सङ्कलन, कानुनी प्रव्रिmयालगायतका विषयमा थप निर्णय गर्न र आवश्यक अनुसन्धान गरी कानुन अनुसारको कारबाही प्रव्रिmया अगाडि बढाउन चौदण्डीगढी नगरपालिकालाई जिम्मा लगाइएको प्रजिअ लुइटेलले बताउनुभयो ।
चौदण्डीगढी नगरपालिकाका प्रमुख प्रशासकीय अधिकृत काजिमान राईले १७ वटामध्ये १६ वटा टिप्परको चाबी पालिकाले लिएको र ती टिप्पर नगरपालिकाको नियन्त्रणमा राखिएको तथा त्यसमा ककसको संलग्नता रहेको भन्ने विषयमा थप कुरा अनुसन्धानका भइरहेको बताउनुभयो ।
प्रमुख प्रशासकीय अधिकृत राईले राष्ट्रिय गौरवको आयोजना निर्माणका नाममा कोहीकसैलाई अवैध उत्खननको अनुमति नहुने प्रस्ट पार्दै नियन्त्रित टिप्परलाई कोशी प्रदेश सरकारको आर्थिक ऐन, २०८१ को अनुसूची ११ अनुसार कारबाही गरिने बताउनुभयो ।
राष्ट्रपति चुरे संरक्षण कार्यक्रम कार्यान्वयन कार्यविधि अनुसार जेठ ३१ देखि असोज १ गतेसम्म व्यक्तिको नम्बरी जग्गा वा खोला कहीँबाट पनि नदीजन्य पदार्थको उत्खनन गर्न नपाइने स्पष्ट कानुनी व्यवस्था छ । उत्खनन गरिएको माटो सीताराम कन्स्ट्रक्सन बेलटारले सासेक राजमार्ग सुधार योजनाको पूर्वी खण्ड कञ्चनपुर–कमलामा काम गरिरहेको चाइना रेलवे नं. २ इन्जिनियरिङ समूह कम्पनी लिमिटेडलाई बिक्री गरेको बताइएको छ ।
