गोरखापत्र अनलाइन
काठमाडौं, साउन ११ गते । नेपाल वाङ्मय परिषद धनगढी, कैलालीले कृति विमोचन तथा स्रष्टा सम्मान कार्यक्रम सम्पन्न गरेको छ । कार्यक्रमको प्रारम्भमा संस्थाका अध्यक्ष डा. पुष्करराज भट्टले संस्थाका गतिविधिबारे जानकारी गराउनुभयो ।
नेपाल सरकारका पूर्व पशुपक्षी मन्त्री तथा साहित्यकार शान्ता मानवीको प्रमुख आतिथ्यतामा कार्यक्रम सम्पन्न भएको हो । कायृक्रममा डा. हरिप्रसाद भण्डारीलाई पद्मा–रामचन्द्र लघुकथा सम्मान २०८१ प्रदान गरिएको छ ।
सम्मानित स्रष्टा डा. भण्डारीको जीवनी, कृतित्व र व्यक्तित्व बारेमा शेखर अर्यालले प्रकाश पार्नुभएको थियो । उहाँले डा. भण्डारीको लेखनयात्राका साथै सम्पादन एवं समालोचनाका क्षेत्रमा गर्नुभएको योगदानको बारेमा चर्चा गर्नुभयो । सम्मानित प्रतिभा डा.भण्डारीले आफ्ना अनुभूति प्रकट गर्नुभएको थियो ।
समारोहमा नेपाल वाङ्मय परिषदका अध्यक्ष डा. पुष्करराज भट्टको सिर्जनातर्फको छैठौं कृति आमा धरती बाबु आकाशको प्रमुख अतिथि लगायत सम्पूर्ण सहभागीले विमोचन गर्नुभयो । समारोहमा विमोचित कृतिको बारेमा डा. शेखरकुमार श्रेष्ठले प्रकाश पार्नुभयो । उहाँले यस कृतिमा अनुभूति, संवेदना, संघर्षका साथै मानवीय जीवनका विभिन्न पक्षको बारेमा जानकारी दिनुभयो ।
कार्यक्रममा दीपक लोहनी, नवराज रिजाल, डा. टीकाराम पोख्रेल, मातृका पोखरेलले शुभकामना मन्तव्य राख्नुभएको थियो । विमोचित कृतिका रचना लघुकथाकार किशन पौडेल, मनीषकुमार शर्मा समित्, इन्दिरा चापागाई, प्रार्थना खनाल एवं शान्ता तिम्सिनाले वाचन गर्नुभएको थियो ।
प्रमुख अतिथि शान्ता मानवीले आफ्नो जीवन राजनीतिक क्षेत्रमा बढी बितेको भए पनि आफूले साहित्य क्षेत्रलाई सधैँ माया गरिरहने विचार व्यक्त गर्नुभयो । उहाँले साहित्यले समाज र राजनीतिलाई सही दिशामा ल्याउन मद्दत पुग्ने बताउनुभयो । संस्थाको अध्यक्ष डा. पुष्करराज भट्टको अध्यक्षतामा सम्पन्न कार्यक्रमको सञ्चालन गोविन्द अर्याल ‘श्रृङ्खला’ले गर्नुभएको थियो ।
