यामराज बिष्ट
पञ्चकोशी (दैलेख) जेठ १८ गते । राउटे समुदायका युवतीमाथि दुर्व्यवहार गरेको भिडियो सार्वजनिक गरेको आरोपमा प्रहरीले एक जनालाई पक्राउ गरेको छ । राउटे समुदायका युवतीहरूलाई गलत नियतसहित दुर्व्यवहार गरेको भिडियो सार्वजनिक भएपछि आठबीस नगरपालिका–३ का २८ वर्षीय टोपेन्द्र शाहीलाई दैलेख प्रहरीले पक्राउ गरेको हो ।
राउटे समुदायका युवतीमाथि दुर्व्यवहार गरेको भिडियो सार्वजनिक भएपछि जिल्ला प्रहरी कार्यालय सुर्खेतमा उजुरी आएपछि टोपेन्द्र शाहीलाई घरबाटै पक्राउ गरी सुर्खेत पठाइएको जिल्ला प्रहरी कार्यालय दैलेखका प्रहरी निरीक्षक देवीराम भण्डारीले बताउनुभयो ।
१५ सकेन्ड लामो उक्त भिडियोको चार दिनअघि सार्वजनिक भएपछि अधिकारकर्मीहरुले उजुरी गरेपछि पक्राउ गरिएको उहाँले जानकारी दिनुभयो । घटनाबारे थप अनुसन्धान भइरहेको प्रहरीले जनाएको छ ।
