.jpg)
लमजुङ समाचारदाता
लमजुङ, वैशाख ३० गते । यो वर्ष अन्नपूर्ण संरक्षण क्षेत्रमा पर्यटक आगमन उल्लेख्य रूपमा बढेको छ । गत अप्रिलमा मात्र ४४ हजार ७६३ विदेशी पर्यटकले यस क्षेत्रको भ्रमण गरेका छन् ।
अन्नपूर्ण संरक्षण क्षेत्र आयोजना (एक्याप) का अनुसार यो सङ्ख्या गत वर्ष सोही महिनाको तुलनामा १० हजार ८५२ ले बढी हो । सन् २०२३ को अप्रिलमा ३३ हजार ९११ विदेशी पर्यटकले यस क्षेत्रको भ्रमण गरेका थिए । एक्यापको आँकडा अनुसार पछिल्ला वर्षमा पर्यटन आगमन दरमा निरन्तर वृद्धि भइरहेको छ ।
एक्यापका प्रमुख डा. रविन कडरियाले सन् २०२४ को पहिलो चार महिनामा कुल एक लाख तीन हजार २४ पर्यटकले भ्रमण गरेको बताउनुभयो । यो सङ्ख्या गत वर्ष सन् २०२३ को सोही अवधिको तुलनामा ७८ हजार ९६८ ले बढी हो । सन् २०२२ को पहिलो चार महिनामा भने ६८ हजार ७५६ पर्यटकले मात्र अन्नपूर्ण संरक्षण क्षेत्रको भ्रमण गरेका थिए । उहाँले कोभिड–१९ पछि शिथिल बनेको यस क्षेत्रको पर्यटन पुनः पुरानै लयमा फर्किएको बताउनुभयो । उहाँका अनुसार गत मार्चमा ३६ हजार ८३४ पर्यटकले अन्नपूर्ण क्षेत्रको भ्रमण गरेका थिए भने त्यसअघि फेब्रुअरीमा १२ हजार ६८ र जनवरीमा नौ हजार ३५९ पर्यटक आएका थिए ।
अन्नपूर्ण संरक्षण क्षेत्र पदयात्रा पर्यटनका लागि विश्वप्रसिद्ध गन्तव्य हो । अन्नपूर्ण पदमार्ग विश्वका १० गन्तव्यमा पर्दछ । एक्यापले अन्नपूर्ण चक्रीय पदमार्गमा घुमफिर गर्ने विदेशी पर्यटकको मात्र तथ्याङ्क राख्ने गरेको छ । अन्नपूर्ण चक्रीय पदमार्गमा अन्नपूर्ण आधार शिविर, कास्कीको मर्दी हिमाल, सिक्लेस, ल्वाङ, घान्द्रुकगाउँ, मनाङको तिलिचो ताल, थोरङ्लाभन्ज्याङ, उपल्लो मुस्ताङ, मुक्तिनाथ क्षेत्र, म्याग्दीको घोडेपानी, पुनहिललगायत गन्तव्य स्थलमा बर्सेनि लाखौँ आन्तरिक तथा बाह्य पर्यटक आउने गरेका छन् ।
सात हजार छ सय वर्ग किलोमिटरमा फैलिएको अन्नपूर्ण संरक्षण क्षेत्रमा कास्की, लमजुङ, मनाङ, म्याग्दी र मुस्ताङका १५ स्थानीय तहका ८७ वडा पर्छन् । यो क्षेत्र प्राकृतिक सौन्दर्य, जैविक विविधता, हिमाली जनजीवन, सभ्यता, संस्कृति आदि कारणले आन्तरिक तथा बाह्य पर्यटकको रोजाइमा पर्ने गरेको छ । हिमशृङ्खलासहितका आकर्षक गन्तव्य स्थल, पर्यटनमैत्री पूर्वाधार, हावापानी, स्थानीयवासीको आतिथ्य र सेवा सुविधाका हिसाबले अन्नपूर्ण चक्रीय पदमार्ग घुमफिरका लागि विश्वकै उत्कृष्ट गन्तव्यका रूपमा चिनिएको छ ।
-square-thumb.jpg)
-original-thumb.jpg)
