दाउन्नेमा अब सवारी साधन रोकेर बाटो विस्तार गरिने

बोमलाल गिरी
नवलपुर, चैत २३ गते । नारायणघाट–बुटबल सडक खण्डको दाउन्नेमा अब दिउँसो पाँच घण्टा र राति ६ घण्टा आवागमन बन्द गरी सडक विस्तारको काम गरिने भएको छ ।

नवलपरासी पूर्व र पश्चिमका सरोकारवालाहरूको शनिबार दाउन्नेमा बसेको बैठकले आवागमन बन्द गरेर सडक विस्तारको कामलाई तीव्रता दिने निर्णय गरेको जिल्ला ट्राफिक कार्यालय नवलपुरका प्रमुख, प्रहरी निरीक्षक जनक बन्जराले जानकारी दिनुभयो ।

उहाँका अनुसार चैत २७ देखि ३१ गतेसम्म पाँच दिन बिहान ११ बजेदेखि दिउँसो ३ बजेसम्म र वैशाख १ देखि १५ गतेसम्म राति ११ देखि बिहान ५ बजेसम्म सवारी साधन रोकेर सडक विस्तारको काम गरिने भएको हो ।

पछिल्लो समय दाउन्ने खण्डमा कामले तीव्रता पाएपनि यात्रुले निक्कै सास्ती पाएको र दाउन्ने पार गर्न १० घण्टासम्म समय लाग्न थालेपछि दुबै जिल्लाका सरोकारवाला छलफलमा जुटेका हुन् । दाउन्ने क्षेत्रमा निर्माण कम्पनीले यात्रुलाई सहज हुने ढङ्गले भन्दा पनि आफूलाई सजिलो हुने गरी काम गर्दा यात्रुले सास्ती पाएका छन् ।

दाउन्नेको १४ किलोमिटर सडक पार गर्न सामान्य अवस्थामा दुईदेखि चार घण्टा लाग्ने गरेकोमा पछिल्लो केही दिन यता यो खण्डको १४ किलोमिटर पार गर्न ८ देखि १० घण्टासम्म लाग्ने गरेको छ ।

ठाउँठाउँमा ठुलाठुला खाल्डाखुल्टी, दुई फिटसम्मको धुलाम्य सडक, कल्भर्ड निर्माणका लागि काम भएका अधिकांश ठाउँमा एकतर्फी यातायात सञ्चालन आदिले गर्दा दाउन्नेको यात्रा कष्टपूर्ण बनेको हो ।

धुलो धुँवाले बाटो देख्नै गाह्रो हुने गरेको छ भने धुलोले निक्कै सास्ती भएको स्थानीयले बताएका छन् । सडक पूर्ण रुपमा जाम हुने र एकतर्फी रूपमा खुल्ने क्रम नियमित जस्तो भएकोले अहिले दाउन्नेमा २४ घण्टा नै ट्राफिक प्रहरी खटाउन परेको जल्ला ट्राफिक कार्यालयका प्रमुख बन्जाराको भनाइ छ ।

बैठकले बाटोमा कुनै सवारी साधन बिग्रेर जाम हुने अवस्था आउन नदिन अवरुद्ध भएका सवारी साधन हटाउन आवश्यक यन्त्र उपकरण सडक आयोजना र निर्माण कम्पनीले सोही खण्डमा आवश्यक जनशक्तिसहित २४सैं घण्टा तयारी अवस्थामा राख्न पनि निर्देशन दिएको छ ।

छलफलमा दुवै जिल्लाका समन्वय प्रमुखहरू, प्रमुख जिल्ला अधिकारीहरु, बर्दघाट नगरपालिका प्रमुख, विनयी त्रिवेणी गाउँपालिका प्रमुख, दुबै योजनाका योजना प्रमुख, योजनाको परामर्शदाता, निर्माण व्यवसायी एवम् सुरक्षा निकायका प्रमुखहरूको उपस्थिती थियो ।

सरकारले दिएको समय सीमा अनुसार यहि चैतभित्र दाउन्नेसहित सबै एक सय १४ किलोमिटर बाटो एकतर्फी कालोपत्रै गर्नुपर्ने छ । 

यो सडकलाई दुई खण्डमा विभाजन गरी ठेक्का गरिएको छ  । ११४ किमी सडकमध्ये ७० किमी ६ लेन, २९ किमी ४ लेनसहित दुवैतर्फ ६÷६ मिटरको सर्भिस लेन, दाउन्नेमा १४ किमी ३ लेनको सडक हुनेछ  । बिचमा ६४ वटा पुल र ४६२ वटा कलभर्टलगायत संरचना निर्माण गर्नुपर्ने छ ।