फिस्लिङ–आग्रिडाँडा सडक अनिश्चितकालका लागि बन्द

गुणबहादुर रोका     
सुलीकोट, चैत २३ गते । गोरखाको गण्डकी गाउँपालिका–६ अन्तर्गत पर्ने पृथ्वीराजमार्गको फिस्लिङदेखि आग्रिडाँडा हुँदै गाउँकार्यपालिका जाने सडकखण्ड शनिबारदेखि अनिश्चियतकालका लागि बन्द भएको छ ।

गाउँपालिकाले सडक कालोपत्र गर्न भन्दै फिस्लिङ–आग्रिडाँडा–हुँदै भैरवीसम्मको झण्डै तीन किलोमिटर सडक शनिबारदेखि अर्को सूचना नआएसम्म लागि बन्द रहने गण्डकी गाउँपालिकाका अध्यक्ष दीपक तिमिल्सेनाले जानकारी दिनुभयो ।

उहाँका अनुसार गण्डकी गाउँपालिका र सङ्घीय समपुरक कोष योजना आयोगको चार करोड ६८ लाख रुपियाँमा लागतको सयुक्त साझेदारीमा सडक कालोपत्रे गर्ने काम भएकाले पृथ्वी राजमार्गअन्तर्गत फिस्लि–आग्रिडाँडा हुँदै भैरवी जाने सवारी आवगमनमा पूर्णरूपमा बन्द गरिएकाले वैकल्पिक मार्गको खोजी गरी सवारी साधन सञ्चालन गर्न गाउँपालिकाले आग्रह गरेको छ ।

सडक बाटो भएर गाउँपालिकादेखि फिस्लिङ जाने यात्रुलाई केहि दिनका लागि असहज भएता पनि केहि दिनपछि कालेपत्रे सडकबाट भएर फिस्लिङ, आग्रिडाँडा, भैरवी र गाउँपालिकाको कार्यालयसम्म आवतजावत गर्न सहज यात्रा बनाइने गाउँपालिकाले विश्वास लिएको शुक्रबार प्रमुख प्रशासकीय अधिकृतले हस्ताक्षारित गरेको विज्ञाप्तिमा भनिएको छ । 

गाउँपालिकाले सडक कालोपत्रे हुने भएपछि उक्त सडकखण्डमा सवारी आवतजावतमा पूर्णरूपमा रोक लगाई सवारी प्रयोगकर्ताहरूले वैकल्पिक मार्गको रूपमा फिस्लिङदेखि बनटार हुँदै आग्रिडाँडा निस्कने सडक बाटो प्रयोग गर्न पनि गाउँपालिकाले आग्रह गरेको छ । बाटोको कारण यात्रुलाई पर्न गएको असुविधा प्रति गाउँपालिका सचेत रहेको बताइएको छ ।