मातृशिशु मृत्युदर कम गर्न बाँकेमा पारिवारिक विवरण सङ्कलन

सिराज खान
नेपालगन्ज, चैत २३ गते । लुम्बिनी प्रदेश सरकारले मातृ शिशु मृत्युदर कम गर्न बाँकेमा मोबाइलमार्फत पारिवारिक स्वास्थ्य विवरण तयार गर्ने अभियान सञ्चालन गरेको छ । महिला, बालबालिका तथा किशोरीको स्वास्थ्य तथा पोषणमा सुधार ल्याउने उद्देश्यले यो अभियान सञ्चालन गरिएको हो ।

लुम्बिनी प्रदेशका बाँके, पाल्पा र अर्घाखाँचीमा मातृ तथा बालमृत्युदर अत्यन्तै कमजोर भएकाले तीनवटै जिल्लामा परिवार स्वास्थ्य विवरण तयार गर्न यो अभियान सुरु गरिएको जनाइएको छ ।

जटिल अवस्था र दुई वर्ष मुनिका बालबालिकाहरूको समयमै पहिचान गरी स्वास्थ्य तथा पोषण अवस्थामा सुधार ल्याउन यो अभियानले महत्त्वपूर्ण सहयोग पुर्‍याउने स्वास्थ्य कार्यालय बाँकेले जनाएको छ ।

स्वास्थ्य कार्यालय बाँकेका सूचना अधिकारी नरेश श्रेष्ठले जिल्लामा मातृ मृत्युदर र बाल मृत्युदर घटाउन यो अभियानले सघाउ पुर्‍याउने जनाउँदै गर्भवती महिलाले नियमित चेकजाँच नगर्ने र स्वास्थ्य संस्थामा सुत्केरी हुन नआउने गरेकाले पनि मातृ मृत्युदर र बाल मृत्युदर न्यूनीकरण चुनौतीपूर्ण बनेको बताउनुभयो ।

बाँकेमा १४ प्रतिशत गर्भवतीले गर्भ जाँच नगराउने र २७ प्रतिशत महिलाले सुत्केरी पश्चात गराउनु पर्ने जाँच समेत नगराउने गरेको पाइएको उहाँले बताउनुभयो । 

पारिवारिक विवरण सङ्कलनका लागि बाँकेका एक लाख २९ हजार ३०७ घरधुरीमा स्वास्थ्यकर्मी पुग्ने स्वास्थ्य कार्यालयले जनाएको छ । सो अभियानअन्तर्गत गर्भवती महिलादेखि बच्चा जन्मेको दुई वर्षसम्म नियमित निगरानीमार्फत् जटिल अवस्थाका गर्भवती महिलादेखि खोपबाट बञ्चित बालबालिका र पोषणबृद्धि अवस्थाको अनुगमन गरिने छ ।