रवि लामिछानेलाई विमानमार्फत भैरहवा ल्याइयो

लक्ष्मण पौडेल

भैरहवा, चैत २३ गते । उच्च अदालत तुलसीपुर बुटवल इजलासको आदेशपछि काठमाडौँमा पक्राउ परेका रास्वपा सभापति रवि लामिछानेलाई भैरहवा ल्याइएको छ ।

शुक्रवार राति पक्राउ परेका लामिछानेलाई विमानमार्फत शनिवार बिहान भैरहवा ल्याइएको हो । जिल्ला प्रहरी कार्यालय रुपन्देहीका अनुसार यती एयरलाइन्सको विमानबाट उनलाई भैरहवा ल्याइएको हो ।

भैरहवा विमानस्थलमा अवतरण गरेसँगै लामिछानेलाई जिल्ला प्रहरी कार्यालयमा लगिएको छ । सङ्गठित रूपमा सहकारी ठगी गरेको आरोप खेपिरहेका रास्वपा सभापति लामिछानेलाई तुलसीपुर उच्च अदालतको बुटवल इजलासले शुक्रवार थुनामा पठाउन आदेश दिएको थियो ।

त्यसपछि राति प्रहरीले बूढानीलकण्ठस्थित निवासबाटै उहाँलाई नियन्त्रणमा लिएको थियो । बुटवलको सुप्रिम सहकारी प्रकरणमा जिल्ला अदालत रुपन्देहीले उहाँलाई एक करोड रूपियाँ धरौटी माग गरेको थियो ।

जिल्ला अदालतको आदेश उल्ट्याउँदै उच्चले थुनामा पठाउने आदेश गरेको हो । लामिछानेलाई रुपन्देही प्रहरीको हिरासतमा राखिनेछ । शनिवार र आइतबार जिल्ला प्रहरीमा राखिने र सोमबार कार्यालय खुलेपछि प्रक्रिया पुर्‍याएर मात्रै कारागार पठाइने प्रहरीले जनाएको छ ।