शैक्षिक सुधारमा क्रियाशील बन्दै चेपाङ महिला

मुरारी अधिकारी
धादिङ, चैत्र २२ गते । कुनै समय विद्यालय शिक्षाबाट टाढा बन्न रुचाउने चेपाङहरु आज विद्यालय शिक्षाको महत्त्व बताउन थालेको देखिन्छ । आजभोलि धादिङको बेनीघाट रोराङ गाउँपालिका–८ की सरिता चेपाङ अधिकांश दिनहरुमा गोठिभञ्ज्याङ आधारभूत विद्यालय पुग्नु हुन्छ । उहाँ शिक्षक होइन, न विद्यालयको कर्मचारी नै हो । तर छोरीको पढाई बुझ्न र छोरीलाई उत्प्रेरणा दिन विद्यालय पुग्नु हुन्छ । छोरीसँगै विद्यालय पुग्ने सरिताले शिक्षाको महत्व र शैक्षिक सुधारका लागि विद्यार्थी, शिक्षक र अभिभावकको भूमिकाका बारेका जानकार हुनु भएको छ ।    

गोठिभञ्ज्याङ टोलका बालबालिकाहरु नियमित विद्यालय जाँदैन थिए । घरमा पनि पढ्ने वातावरण थिएन । सरसफाइमा समेत ध्यान दिइएको पाइँदैन थियो । बालबालिकाप्रति अभिभावकहरुको चासो कम थियो । विद्यालय शिक्षिका सानुमाया चेपाङले उपायहरुको खोजि गर्ने क्रममा प्रयास नेपालकी सुमित्रा चेपाङसँगको भेटले शैक्षिक क्षेत्रमा ठुलो परिवर्तन ल्यायो ।   

अभिभावक शिक्षा कक्षा सञ्चालन भयो । विद्यालय व्यवस्थापन समितिको बैठक, अभिभावक शिक्षा सत्र सञ्चालन, नियमित बैठक लगायतका क्रियाकलापले सरिता जस्तै थुप्रै आमाहरुलाई विद्यालय र शैक्षिक गतिविधिसँग जोड्यो । अभिभावकको नियमित सक्रिय उपस्थिति, छलफलमा बाल विकास उमेरका बालबालिकाप्रति अभिभावकहरुको उत्तर दायित्व, बाल विकास कक्षाका सहजकर्ता र अभिभावकको सम्बन्ध, बालबिकासको महत्त्व, शिक्षाको महत्त्व, अभिभावक, शिक्षक, विद्यार्थीविचको सम्बन्ध लगायतका विषयमा छलफलले गाउँमा परिवर्तन ल्यायो ।

छोरीको भविष्य खोज्दै गरेकी सरिताले विद्यालयबाट धेरै कुरा सिकेको उहाँको अनुभव छ । छोराछोरीलाई विद्यालय पठाए भइहाल्यो नि भन्ने मानसिकता हटेको छ । अभिभावकले चासो दिए बालबालिकाको शैक्षिक सुधार सहज हुने लगायतका कुराहरु थाहा पाएको उहाँले बताउनुभयो ।

सरिता जस्तै जनप्रभात आधारभूत विद्यालयकी बिबिता चेपाङ, सोमिता चेपाङ, कालिका माध्यामिक विद्यालयकी चन्द्र कुमारी चेपाङ, फुलमाया चेपाङ अहिले बेनिघाटरोराङ गाउँपालिका वडा नम्बर ६, ८ र १० का १९ सामुदायिक विद्यालयका ३ सय जना आमा अभिभावकहरु विद्यालय र बालबालिकाहरुको पढाईप्रति चासो दिन थालेका छन् । अभिभावकहरुको सक्रियता बढेसँगै बालबालिका नियमित आउने गरेको, सरसफाइमा ध्यान दिने, शैक्षिक गुणस्तरमा सुधार भएको वाल विकास शिक्षिका सरस्वती चेपाङले बताउनुभयो ।  

चाईल्ड फण्ड जापानको साझेदारीमा प्रयास नेपाल धादिङले सञ्चालन गरेको शिक्षामा पहुँच सुनिश्चितता परियोजनाले बेनीघाट रोराङ गाउँपालिका भित्र रहेका विद्यालयको शैक्षिक सुधारमा ठुलो सहयोग पुगेको बेनीघाट रोराङ गाउँपालिका शिक्षा अधिकृत बोधराज पाठकले बताउनुभयो ।