गोकर्ण पौडेल
तुलसीपुर, फागुन २३ गते । तुलसीपुरमा दुई वटा मोटरसाइकल एकआपसमा ठोक्किँदा तीन जना घाइते भएका छन् । प्रहरीका अनुसार रा ३ प २५३४ नम्बरको मोटरसाइकल चालक तुलसीपुर उपमहानगरपालिका–१ भम्केका ५६ वर्षीय नेत्रलाल पौडेल, रा २ प ५२८४ नम्बरको मोटरसाइकल चालक राजपुर गाउँपालिका– ७ का ५० वर्षीय पशुराम साहु र सवार सोही ठाउँका ३५ वर्षका नन्दा पुन मगर रहेको प्रहरीले जनाएको छ ।
इलाका प्रहरी कार्यालय तुलसीपुरका प्रहरी निरीक्षक सूर्य रानाका अनुसार घाइते पौडेलको दायाँ हात, बायाँ खुट्टा र मुखमा चोट लागेको र पौडेलको अवस्था मध्यम रहेको बताउनुभयो ।
प्रहरी निरीक्षक रानाका अनुसार घाइते साहुको टाउको, मुख र बायाँ हातमा चोट लागेको छ । उहाँको अवस्था गम्भीर रहेको प्रहरीले जनाएको छ । मोटरसाइकलमा पछाडि सवार पुनको टाउकोमा चोट लागेको र अवस्था मध्यम रहेको प्रहरी निरीक्षक रानाले बताउनुभयो ।
घाइते तीनै जनाको राप्ती प्रादेशिक अस्पताल तुलसीपुरमा उपचार भइरहेको छ । तुलसीपुरबाट शीतलपुरतर्फ जाँदै गरेको रा ३ प २५३४ नम्बरको मोटरसाइकल र विपरीत दिशाबाट आउँदै गरेको रा २ प ५२८४ नम्बरको मोटरसाइकल शुक्रबार बिहान ११ बजेतिर तुलसीपुर– ११ उरहरी चोकमा एकआपसमा ठोक्किएका थिए ।
दुबै मोटरसाइकललाई प्रहरी चौकी जसपुरले नियन्त्रणमा दिएको छ । घटनाबारे थप अनुसन्धान भइरहेको प्रहरीले जनाएको छ ।
