रमेश विश्वकर्मा
गुल्मी, फागुन २३ गते । गुल्मीको रेसुङ्गा नगरपालिका-३, भाडगाउँमा राष्ट्रिय प्रसारण लाइनको विद्युतीय सेवा सुचारु गरिएको छ । भाडगाउँमा राष्ट्रिय प्रसारण लाइनको विद्युतीय सेवा पुर्याउनका लागि यस जिल्लाको उनायचौरमा निर्माण भएको १३२ केभीको राष्ट्रिय प्रसारण लाइनको उनायचौर सब-स्टेसनबाट ११ केभीको फिडर लाइन निकालिएको हो।
सामुदायिक विद्युतबाट यहाँका नागरिकले निकै समस्या खेप्नुपरेको थियो । अब राष्ट्रिय प्रसारण लाइनको विद्युतीय सेवा सुचारु भएसँगै समस्या समाधान हुने भएको भन्दै स्थानीयहरू खुसी हुनुभयो । स्थानीय महेश पन्थीले सामुदायिक विद्युतबाट यहाँका नागरिकमा लामो समयदेखि निकै समस्या भएको बताउनुभयो । अब भाडगाउँबासी ३७० घरधुरीका आमनागरिक सामुदायिक विद्युतको समस्याबाट मुक्त भएको उहाँको भनाइ छ।
यस वडाका वडाअध्यक्ष बाबुराम खत्रीले राष्ट्रिय प्रसारण लाइनको विद्युतीय सेवाले सामुदायिक विद्युतमार्फत् आउने समस्याको समाधान भएको बताउनुभयो । अब ढुक्कसँग यहाँका आमनागरिकले विद्युतको प्रयोग गर्नुहुने भन्दै उहाँले विद्युत् अवरोध सिर्जना हुने समस्या समाधान भएको बताउनुभयो । भाडगाउँमा ११ केभी फिडर लाइनबाट अब राष्ट्रिय प्रसारण लाइनको विद्युत् पुगेको नेपाल विद्युत् प्राधिकरण गुल्मी वितरण केन्द्रका निमित्त प्रमुख इन्जिनियर भरत पोखरेलले बताउनुभयो ।
गुल्मी वितरण केन्द्रमा यहाँका नागरिकले धेरै पहिलेदेखि गुनासो गर्नुका साथै रेसुङ्गा नगरपालिका नगरप्रमुख खिलध्वज पन्थीको विशेष पहलमा उनायचौर सब-स्टेसनबाट विद्युतीय सेवा उपलब्ध गराइएको हो । यससँगै भाडगाउँका आमनागरिकलाई राष्ट्रिय प्रसारण लाइनको विद्युतीय सेवासँग जोडिएको नगर प्रमुख पन्थीले बताउनुभयो ।
राष्ट्रिय प्रसारण लाइनको विद्युतीय सेवा सुचारु भएसँगै यस वडाका आमनागरिकले सामुदायिक विद्युतबाट भोग्नुपरेको समस्या समाधान भएको भन्दै उहाँले आमनागरिकले विद्युतीय सेवाको सहि सदुपयोग गर्नुहुनेछ भन्ने विश्वास लिएको बताउनुभयो । नगरपालिका सधै नागरिकको साथमा रहेको उहाँको भनाइ छ ।
