गोरखापत्र समाचारदाता
काठमाडौँ, माघ १२ गते । चलचित्र ‘लाज शरणम्’ को नयाँ पोस्टर शुक्रबार सार्वजनिक भएको छ । पोस्टरले चलचित्रका पात्र र उनीहरूको चरित्रलाई देखाएको छ । पोस्टरमा चलचित्रका मुख्य कलाकार मुकुन्द श्रेष्ठ, महेश त्रिपाठी, विजय बराल, अर्पण थापा र कमलमणि नेपाललाई प्रस्तुत गरिएको छ । पोस्टरमा देखिनुभएका अभिनेता सीताराम कट्टेल (धुर्मुस) को गेटअपले यतिबेला चर्चा कमाएको छ । नेताको भूमिकामा देखिनुभएका कट्टेललाई दौरासुरुवाल र ज्वारीकोटमा देखाइएको छ । ‘लाज शरणम्’ हास्य टेलिशृङ्खला ‘सक्किगोनी’ समूहले निर्माण गरेको हो । अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी) लगायतका कलाकारले अभिनय गरेका छन् । चलचित्रको निर्देशन कुमार कट्टेल ‘जिग्री ब्रो’ ले गर्नुभएको छ । जेपिटी क्रियसनको ब्यानरमा निर्माण भएको चलचित्रमा नवीन श्रेष्ठ निर्माता, राम नरेश शाह र सिर्जना खड्का सहनिर्माताका रूपमा रहनुभएको छ । चलचित्र फागुन १४ गते महाशिवरात्रिको दिन प्रदर्शन हुने भएको छ ।
