लिग च्याम्पियन चर्च ब्वाइजलाई हराउँदै सङ्कटा सेमिफाइनलमा

काठमाडौँ, माघ १० गते । ‘ए’ डिभिजन लिग च्याम्पियन टोली चर्च ब्वाइजलाई हराउँदै सङ्कटा क्लब कांग्रेस सभापति कप फुटबलको सेमिफाइनलमा प्रवेश गरेको छ ।

दशरथ रङ्गशालामा बिहीबारदेखि सुरु भएको प्रतियोगिताको उद्घाटन खेलमा सङ्कटाले चर्च ब्वाइजलाई ३–० गोलले हरायो ।

हारसँगै चर्च ब्वाइज प्रतियोगिताबाट बाहिरिएको छ । सङ्कटालाई जिताउन अबेक रिर्चडले २३औँ र ७०औँ मिनेटमा दुई गोल गर्नुभयो । अर्को गोल ७३औँ मिनेटमा चन्दन दासले थप्नुभएको थियो । 

नेपाली कांग्रेस अन्तर्गत नेपाल लोकतान्त्रिक खेलकुद सङ्घ महाधिवेशन निर्देशन समितिको आयोजनामा सञ्चालित नकआउट प्रतियोगितामा आठ टिमको सहभागिता रहेको छ ।

माघ १७ गतेसम्म चल्ने प्रतियोगिताको विजेता टिमलाई २६ लाख र उपविजेतालाई १३ लाख रुपियाँ पुरस्कार प्रदान गरिनेछ । यो नेपाली नकआउट फुटबलको सर्वाधिक पुरस्कार राशी हो । हरेक खेलमा म्याच फीको रूपमा प्रत्येक टिमलाई ५० हजार प्रदान गरिने छ ।

यस्तै प्रत्यके खेलको प्लेयर अफ दिम्याचलाई १५ हजार, सर्वोत्कृष्ट खेलाडीलाई ७५ हजार, उत्कृष्ट गोलरक्षकलाई ५० हजार, सर्वाधिक गोलकर्तालाई ५० हजार र उदीयमान खेलाडीलाई २५ हजार रुपियाँ प्रदान गरिने आयोजकले जनाएको छ । प्रतियोगिताको बिहीबार युवा तथा खेलकुदमन्त्री तेजुलाल चौधरीले उद्घाटन गर्नुभयो ।