जय ट्रफीमा मयनको शतक

काठमाडौँ, पुस २२ गते । मधेश प्रदेशका मयन यादवले ‘जय ट्रफी मेन्स एलाइट कप’ मा शतक प्रहार गर्नुभएको छ ।

नेपाल क्रिकेट सङ्घ (क्यान) को आयोजनामा आइतबार देखि जनकपुर र वीरगन्जमा सुरु भएको प्रतियोगिताको दोस्रो दिन सोमबार जनकपुरमा भएको खेलमा मधेश प्रदेशका मयनले बागमती प्रदेशविरुद्ध शतक प्रहार गर्नुभएको हो । 

उहाँ यस प्रतियोगितामा शतक प्रहार गर्ने पहिलो खेलाडी पनि बन्नुभएको छ । दोस्रो दिनको खेल जारी रहँदा मयनले एक सय ६ रन बनाउनुभयो । उहाँले एक सय आठ बलमा १२ चौका र दुई छक्काको सहयोगमा शतकीय पारी खेल्नुभएको हो ।

टेस्ट संरचनाको रुपमा सञ्चालित प्रतियोगितामा मधेश, बागमती, नेपाल पुलिस र त्रिभुवन आर्मी क्लबको सहभागिता रहेको छ ।